ନୂଆଦିଲ୍ଲୀ – ଦେଶରେ ଶାନ୍ତି ଭଙ୍ଗ କରିବାକୁ କେହିବି ଚେଷ୍ଟା କଲେ ତାକୁ ଛଡା ଯିବନାହିଁ ବୋଲି ଦିଲ୍ଲୀର ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିଓ୍ୱାଲ କହିଛନ୍ତି । ପଞ୍ଜାବରେ ଆପ୍ ସରକାର ଥିବା ବେଳେ ଅମ୍ରିତ ପାଲ୍ ସିଂ ପ୍ରସଙ୍ଗରେ ସେ ଏହି କଥା କହିଛନ୍ତି । ଅଲଗା ଦେଶ ଖଲିସ୍ତାନ ସମର୍ଥନରେ ଅମ୍ରିତ ପାଲ୍ ସିଂ ବୟାନ ବାଜି କରିବା ସହ ପଞ୍ଜାବରେ ଶିଖ୍ ଯୁବକମାନଙ୍କୁ ଉସକାଉଥିବା ଏବଂ ବେଆଇନ ଭାବେ ଅସ୍ତ୍ରଶସ୍ତ୍ର ରଖିଥିବା ଅଭିଯୋଗ ହୋଇଛି ।
ଅମ୍ରିତପାଲ୍ ସିଂଙ୍କ ସମର୍ଥକମାନଙ୍କୁ ବିପୁଳ ଅସ୍ତ୍ରଶସ୍ତ୍ର ସହ ଗିରଫ କରାଯାଇଛି । ହେଲେ ଓ୍ୱାରିସ୍ ଦେ ପଞ୍ଜାବର ମୁଖ୍ୟ ଅମ୍ରିତ ପାଲ୍ ସିଂ ଫେରାର ହୋଇଯାଇଥିବା କୁହାଯାଉଛି ।ପଞ୍ଜାବରେ ଆଇନ ଶୃଙ୍ଖଳା ପରିସ୍ଥିତି ଲାଗୁ କରିବା ପାଇଁ ପଞ୍ଜାବ ସରକାର ଗତ ଏକ ବର୍ଷ ବେଶ୍ ଭଲ କାମ କରିଥିବା କଥା କେଜ୍ରିଓ୍ୱାଲ କହିଛନ୍ତି । ଅନେକ ନିଶାମାଫିଆଙ୍କୁ ଗିରଫ କରାଯାଇଛି । ଭଗବନ୍ତ ମାନ୍ଙ୍କ ସରକାର ସଂଯମ ରକ୍ଷା କରି ଅନେକ ଦୃଢ ପଦକ୍ଷେପ ଗ୍ରହଣ କରୁଥିବା କଥା ସେ କହିଛନ୍ତି ।
