କଲମପୁର – ଗତ ବିଳମ୍ବିତ ରାତିରେ ଜିଲ୍ଲା ମୁଖ୍ୟ ଚିକିତ୍ସାଳୟ ଠାରେ ଚିକିତ୍ସାଧିନ ଅବସ୍ଥାରେ ଜଣେ ଯୁବକଙ୍କ ମୃତ୍ୟୁ ଘଟିଛି । ଉକ୍ତ ବ୍ୟକ୍ତି ଜଣକ କଲମପୁର ଜୁନାଗଡ ମୁଖ୍ୟ ରାସ୍ତାର ବଙ୍କାପଲା ପଦରପଡା ଛକ ନିକଟରେ ଦୁର୍ଘଟଣାର ଶିକାର ହେଇଥିଲେ । ମୃତକ ପରିବାର ତରଫରୁ ଏନେଇ କଲମପୁର ପୁଲିସ ଥାନାରେ ଏକ ଲିଖିତ ଅଭିଯୋଗ କରାଯାଇଛି । ଏହି ଅଭିଯୋଗ ପାଇବା ପରେ କଲମପୁର ଥାନା ତରଫରୁ ଘଟଣାର ତଦନ୍ତ ଦାଇତ୍ୱରେ ଥିବା ଅଧିକାରୀ ମଙ୍ଗଳବାର ସକାଳେ ଜିଲ୍ଲା ମୁଖ୍ୟ ଚିକିତ୍ସାଳୟ ଅଭିମୁଖେ ବାହାରିଛନ୍ତି । ବଙ୍କାପଲା ପଦରପଡା ଛକ ନିକଟରେ ସୋମବାର ସଂଧ୍ୟାରେ ଘଟିଥିଲା ଦୁର୍ଘଟଣା । ଏଥିରେ ଦୁଇ ଜଣ ବ୍ୟକ୍ତି ଗୁରୁତର ହେଇଥିଲେ ।
ସେମାନଙ୍କ ମଧ୍ୟରୁ ଜଣକର ଅବସ୍ଥା ସଙ୍କାଟାପନ୍ନ ଥିଲା । ଗୁରୁତର ଆହତ ବ୍ୟକ୍ତି ମାନଙ୍କୁ ସ୍ଥାନୀୟ ଲୋକଙ୍କ ଠାରୁ ସୁଚନା ପାଇ କଲମପୁର ଅଗ୍ନିଶମ ବାହିନୀ ଉଦ୍ଧାର କରି କଲମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ସେମାନଙ୍କୁ ପ୍ରାଥମିକ ଚିକିତ୍ସା କରାଯାଇଥିଲା ।
କିନ୍ତୁ ସଙ୍କଟାପନ୍ନ ଥିବା ଥୁଆମୁଳ ରାମପୁର ଥାନା ଅଧିନସ୍ଥ କୁମାରକାନୀ ଗ୍ରାମର ଳଳିତ ମୋହନ ଛତ୍ରିଆଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା । ଚିକିତ୍ସାଧିନ ଅବସ୍ଥାରେ ବିଳମ୍ବିତ ରାତିରେ ଲଳିତଙ୍କ ମୃତ୍ୟୁ ଘଟିଛି ।
ସୁଚନା ଅନୁସାରେ କୁମାରକାନୀ ଗ୍ରାମର ଲଳିତ, ମନୋଜ ନାଏକ ଏବଂ ସିନ୍ଧିପଦର ଗ୍ରାମର ପରମାନନ୍ଦ ନାଏକ ନାମକ ୩ ଯୁବକ ଏକ ପଲସର ବାଇକ ଯୋଗେ ଜୁନାଗଡ କଲମପୁର ରାସ୍ତା ଦେଇ ନିଜ ଗାଁ କୁମାରକାନୀକୁ ଫେରୁଥିବା ବେଳେ ବଙ୍କାପଲା ପଦରପଡା ଛକ ନିକଟରେ ଅନ୍ୟ ଏକ ଅଜଣା ବାଇକ ସେମାନଙ୍କୁ ଧକ୍କା ଦେଇଥିବା ଅଭିଯୋଗ ହେଇଛି ।
