ମୁଖୀଗୁଡା:ପ୍ରେମ ସମ୍ପର୍କ ଥିଲା କିନ୍ତୁ ବିବାହ ପ୍ରସ୍ତାବରେ ପ୍ରେମିକା ରାଜି ନହେବାରୁ ପ୍ରେମିକ ଜଣକ ପ୍ରେମିକାକୁ ତଣ୍ଟିଚିପି ମାରିଦେବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
କଳାହାଣ୍ଡି ଜିଲା ଜୟପାଟଣା ଥାନା ବଡ଼ପୁଝାରିଗୁଡା ଗ୍ରାମପଞ୍ଚାୟତ ବତାସୀଗୁଡା ଗାଁର ୧୭ ବର୍ଷିୟା ନାବାଳିକା ସହ ବାନେର ପଞ୍ଚାୟତ ଅନ୍ତର୍ଗତ ଲୁହାବାହାଲ ଗ୍ରାମର ପ୍ରେମ ଧଙ୍ଗଡା ମାଝୀ (୨୧ )ର ପ୍ରେମ ସମ୍ପର୍କ ଗତ ୨ବର୍ଷ ଧରି ରହିଥିଲା। ପ୍ରେମ ଧଙ୍ଗଡା ମାଝୀ ବିବାହ ପାଇଁ ତା’ର ନାବାଳିକା ପ୍ରେମିକାକୁ ପ୍ରସ୍ତାବ ଦେଇଥିଲା କିନ୍ତୁ ତାର ପ୍ରସ୍ତାବରେ ପ୍ରେମିକା ରାଜି ହୋଇନଥିଲା। ପ୍ରେମ ଧଙ୍ଗଡ଼ା ମାଝୀ ଅନ୍ୟ ଜାତିର ହୋଇ ଥିବାରୁ ନାବାଳିକା ବିବାହ ପାଇଁ ରାଜି ହୋଇ ନଥିଲା।
ଗତ ଗୁରୁବାର ଅପରାହ୍ନ ୪ ଟା ସମୟରେ ନାବାଳିକା ଘରେ ଏକୁଟିଆ ଥିଲା। ଏତିକିବେଳେ ନାବାଳିକାକୁ ତା’ର ପ୍ରେମିକ ପ୍ରେମ ଧଙ୍ଗଡା ମାଝୀ ତଣ୍ଟିଚିପି ହତ୍ୟା କରିଥିଲା। ମୃତ ନାବାଳିକାର ବାପାଙ୍କ ଏତଲ କୁ ଭିତ୍ତିକରି ଜୟପାଟଣା ପୁଲିସ ଆଜି ଅଭିଯୁକ୍ତକୁ ପ୍ରେମ ଧଙ୍ଗଡା ମାଝୀକୁ ଗିରଫ କରି କୋର୍ଟ ଚାଲାଣ କରିଛି।
