ପ୍ୟାନ ବିବରଣୀ ଦେଇ ନାହାନ୍ତି ୭ ସାଂସଦ, ୧୯୯ ବିଧାୟକ: ରିପୋର୍ଟ

ନୂଆଦିଲ୍ଲୀ : ଦେଶରେ ବର୍ତ୍ତମାନର ୭ ସାଂସଦ ଏବଂ ୧୯୯ ଜଣ ବିଧାୟକ ନିଜ ପ୍ୟାନକାର୍ଡ ବିବରଣୀ ଘୋଷଣା କରିନାହାନ୍ତି। ନିର୍ବାଚନ ସମୟରେ ନାମାଙ୍କନପତ୍ର ଦାଖଲ ପାଇଁ ସତ୍ୟପାଠରେ ପ୍ୟାନକାର୍ଡ ତଥ୍ୟ ଦେବାକୁ ପଡ଼ିଥାଏ। ହେଲେ ଏତେ ସଂଖ୍ୟକ ଜନପ୍ରତିନିଧି ସତ୍ୟପାଠରେ ପ୍ୟାନକାର୍ଡ ବିବରଣୀ ଦେଇନାହାନ୍ତି ବୋଲି ଶୁକ୍ରବାର ଗଣତାନ୍ତ୍ରିକ ସଂସ୍କାର ସଂଘ (ଏଡ଼ିଆର) ଏବଂ ନ୍ୟାଶନାଲ ଇଲେକ୍ସନ ୱାଚ(ଏନଇଡବ୍ଲ୍ୟୁ) ପକ୍ଷରୁ ପ୍ରକାଶିତ ରିପୋର୍ଟରେ ଉଲ୍ଲେଖ କରାଯାଇଛି। ଏଡିଆର ୫୪୨ ଲୋକସଭା ସାଂସଦ ଏବଂ ୪,୦୮୬ ଜଣ ବିଧାୟକଙ୍କ ଦ୍ୱାର ନିର୍ବାଚନ ବେଳେ ଦାଖଲ ସତ୍ୟପାଠ ଓ ସ୍ଥାୟୀ ଖାତା ସଂଖ୍ୟା (ପ୍ୟାନ) ବିବରଣୀ ବିଶ୍ଲେଷଣ କରି ଏହି ରିପୋର୍ଟ ପ୍ରସ୍ତୁତ କରିଛି।
ରିପୋର୍ଟ ଅନୁସାରେ କଂଗ୍ରେସର ସର୍ବାଧିକ ୫୧ ଜଣ ବିଧାୟକ ପ୍ୟାନ କାର୍ଡ ତଥ୍ୟ ଦେଇନାହାନ୍ତି। ଏହାପଛକୁ ବିଜେପିର ୪୨ ଜଣ ବିଧାୟକ, ସିପିଏମ୍‍ର ୨୫ ଜଣ ବିଧାୟକ ନିଜ ପ୍ୟାନକାର୍ଡ ତଥ୍ୟ ଦେଇନାହାନ୍ତି। ରାଜ୍ୟ ଅନୁସାରେ କେରଳର ୩୩ ଜଣ ବିଧାୟକ, ମିଜୋରମର ୨୮, ମଧ୍ୟପ୍ରଦେଶର ୧୯ ଜଣ ବିଧାୟକ ନିଜ ପ୍ୟାନକାର୍ଡ ତଥ୍ୟ ଦେଇନାହାନ୍ତି। ମିଜୋରମର ମୋଟ ବିଧାୟକଙ୍କ ସଂଖ୍ୟା ୪୦ ହୋଇଥିବାବେଳେ ୨୮ ଜଣ ବିଧାୟକ ପ୍ୟାନକାର୍ଡ଼ ତଥ୍ୟ ନଦେବା ଘଟଣା ଚର୍ଚ୍ଚାର ବିଷୟ ହୋଇଛି।
ସେହିପରି ସାଂସଦଙ୍କ ମଧ୍ୟରୁ ଓଡ଼ିଶାର ୨ ଜଣ ବିଜେଡି ସାଂସଦ, ତାମିଲନାଡୁର ୨ ଜଣ ଏଆଇଡିଏମକେ ସାଂସଦ, ଆସାମ, ମିଜୋରମ ଏବଂ ଲକ୍ଷାଦ୍ୱୀପର ଜଣେ ଲେଖାଏଁ ସାଂସଦ ପ୍ୟାନ କାର୍ଡ ତଥ୍ୟ ଦେଇନାହାନ୍ତି। ବିଜେପିର ୧୮, କଂଗ୍ରେସର ୯ ଏବଂ ଜେଡିୟୁର ୩ ଜଣ ସାଂସଦଙ୍କ ପକ୍ଷରୁ ଦାଖଲ ପ୍ୟାନ କାର୍ଡ ତଥ୍ୟରେ ତ୍ରୁଟି ଥିବା ଜାଣିବାକୁ ମିଳିଛି।