କଲମପୁର: ଦୁଲକିବନ୍ଧ ଠାରେ ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା ହେବା ଘଟଣା । ଦୁର୍ଘଟଣାରେ ଆହତ ଶିକ୍ଷକଙ୍କ ମୃତ୍ୟୁ ହୋଇଛି । କଟକରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି ।
ସୂଚନା ଅନୁସାରେ ଗତ ଅକ୍ଟୋବର ୨୬ ତାରିଖ ସଂଧ୍ୟାରେ ଜୟପାଟଣା ମୋଟେର ମୁଖ୍ୟ ରାସ୍ତାର ଦୁଲକିବନ୍ଧ ନିକଟରେ ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା ହେଇଥିଲା । ଦୁର୍ଘଟଣାରେ ଦୁଲକିବନ୍ଧ ଗ୍ରାମର ତିଲ ରାଉତ (ମାଝୀ) ମୃତ୍ୟୁ ହେଇଥିବା ବେଳେ ଜଣେ ଶିକ୍ଷକ ବିଜମରା ଗ୍ରାମର କ୍ଷେତ୍ର ମୋହନ ଶବର (ପିଙ୍କୁ) ଗୁରୁତର ଆହତ ହେଇଥିଲେ । ତାଙ୍କୁ ତୁରନ୍ତ ଉଦ୍ଧାର କରି ଜୟପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରୁ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ ବିଶାଖାପାଟଣାରେ ଭର୍ତ୍ତି କରାଯାଇଥିଲା ।
ପରବର୍ତ୍ତୀ ସମୟରେ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ କଟକ ଶ୍ରୀରାମ ଚନ୍ଦ୍ର ଭଞ୍ଜ ମେଡିକାଲ କଲେଜକୁ ସ୍ଥାନାନ୍ତରିତ କରାଯାଇଥିଲା । ହେଲେ ଚିକିତ୍ସାଧୀନ ଅବସ୍ଥାରେ ସୋମବାର ସକାଳ ୮ଟା ବେଳେ ଶିକ୍ଷକ କ୍ଷେତ୍ର ମୋହନଙ୍କ ମୃତ୍ୟୁ ହେଇଥିବା ନେଇ ପରିବାର ଲୋକଙ୍କୁ ଅପରାହ୍ଣ ୩ଟା ବେଳେ ସୂଚନା ଦିଆଯାଇଥିଲା । ଏହି ଖବର ପାଇବା ପରେ ଶିକ୍ଷକଙ୍କ ଗାଁ ବିଜମରାରେ ଶୋକାକୁଳ ପରିବେଶ ସୃଷ୍ଟି ହେଇଛି । କ୍ଷେତ୍ର ମୋହନ ନିକଟସ୍ଥ ପାଣିଗାଁ ବର୍ଲାପଡା ନୂତନ ପ୍ରାଥମିକ ବିଦ୍ୟାଳୟରେ ସହକାରୀ ଶିକ୍ଷକ ଭାବେ ନିୟୋଜିତ ଥିଲେ ।
