ବୌଦ୍ଧ: ଜନସ୍ୱାସ୍ଥ୍ୟ ବିଭାଗ ପକ୍ଷରୁ ବୌଦ୍ଧ ସହରବାସୀଙ୍କୁ ମହାନଦୀରୁ ପାନୀୟଜଳ ଉଠାଇ ବିଶୋଧନ ପରେ ଯୋଗାଇ ଦିଆଯାଉଥିବା ବେଳେ ପାନୀୟ ଜଳରେ ଛୋଟଛୋଟ ସାପ ଭଳି ଜୀବ ଭାସୁଥିବା ନେଇ ସହରରେ ଗୁଜବ ସୃଷ୍ଟି ହୋଇଛି । ସହରର ବୁଟୁପାଲି ଅଞ୍ଚଳରେ ଜୈନିକ ପରିବାର ଏକ ମାଠିଆରେ ପାଣି ରଖିଥିବାବେଳେ ସେଥିରେ ଛୋଟ ଛୋଟ ସାପ ଭଳି କିଛି ଭସୁଥିବା ଦେଖିବାକୁ ପାଇଥିଲେ । ତୁରନ୍ତ ଏହି ଖବର ସାମାଜିକ ଗଣମାଧ୍ୟମରେ ଭାଇରାଲ ହେବା ସହିତ ସହର ସାରା ଖେଳି ଯାଇଥିଲା । ଅନେକ ଲୋକ ଏହାକୁ ନେଇ ପ୍ରତିକ୍ରିୟା ପ୍ରକାଶ କରିବା ସହିତ ନିମ୍ନମାନର ପାନୀୟଜଳ ସହରବାସୀଙ୍କୁ ଯୋଗାଇ ଦିଆଯାଉଥିବା ଅଭିଯୋଗ କରିଥିଲେ । ତେବେ ପାଣିରେ ସାପ ଭଳି ଜୀବ ଭାସୁଥିବା ଅଭିଯୋଗ ନେଇ ଜନସ୍ୱାସ୍ଥ୍ୟ ବିଭାଗର ସହକାରୀ ଯନ୍ତ୍ରୀ ନିରଞ୍ଜନ ସାହୁ ଗଣମାଧ୍ୟମ ଆଗରେ ତାଙ୍କର ପ୍ରତିକ୍ରିୟା ରଖିଛନ୍ତି ।
ବୌଦ୍ଧ ସହରବାସୀଙ୍କୁ ଯୋଗାଇଦିଆଯାଉଥିବା ପାନୀୟଜଳ ସଂପୂର୍ଣ୍ଣ ସୁରକ୍ଷିତ ଏବଂ ଏହାକୁ ଆବଶ୍ୟକୀୟ କେମିକାଲ ପ୍ରୟୋଗ ପରେ ବିଶୋଧନ ପରେ ପାଇପ ଯୋଗେ ଯୋଗାଣ କରାଯାଇଥାଏ ବୋଲି ପ୍ରକାଶ କରିଛନ୍ତି । ତେବେ ବୁଟୁପାଲି ଅଞ୍ଚଳରେ ପାଇପ ପାଣିରେ ସାପ ଭଳି ଜୀବ ଭାସୁଥିବା ନେଇ ଅଭିଯୋଗ ସଂପର୍କରେ ପ୍ରତିକ୍ରିୟା ରଖି ଯନ୍ତ୍ରୀ ଶ୍ରୀସାହୁ ଭାଇରାଲ ଫଟୋ ଓ ଭିଡିଓରେ ପାଣି ଏକ ମାଠିଆରେ ରଖାଯାଇଥିବା ଦେଖାଯାଇଛି । ତେଣୁ ପାଇପ ପାଣି ଯେ ପ୍ରଦୂଷିତ ଏହାକୁ ଗ୍ରହଣ କରିହେବନାହିଁ । ତଥାପି ଲୋକଙ୍କ ଅଭିଯୋଗ ଓ ସୁରକ୍ଷାକୁ ଦୃଷ୍ଟିରେ ରଖି ବୁଟୁପାଲି ଅଞ୍ଚଳରେ ବିଭାଗ ପକ୍ଷରୁ କାର୍ଯ୍ୟକ୍ଷମ ଥିବା ସମ୍ପ(ପାଣିଟାଙ୍କି)କୁ ସଫା କରାଯିବ ଏବଂ କୌଣସି ଗୁଜବକୁ ବିଶ୍ୱାସ ନକରି ଲୋକମାନେ ଭୟମୁକ୍ତ ହୋଇ ଯୋଗାଣ ହେଉଥିବା ପାନୀୟଜଳ ବ୍ୟବହାର କରିପାରିବେ ବୋଲି ଶ୍ରୀସାହୁ ପ୍ରକାଶ କରିଛନ୍ତି ।
