ନୂଆଦିଲ୍ଲୀ . – ରାଫେଲ ଚୁକ୍ତି ସହ ସିବିଆଇର ଦୁଇ ବରିଷ୍ଠ ଅଧିକାରୀଙ୍କ ମଧ୍ୟରେ ଦେଖା ଦେଇଥିବା ବିବାଦକୁ ନେଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଏକ ସାମ୍ବାଦିକ ସମ୍ମିଳନୀ କରିଛନ୍ତି । ସିବିଆଇରେ ଦେଖା ଦେଇଥିବା ବିବାଦକୁ ନେଇ ସେ ପ୍ରଧାନମନ୍ତ୍ରୀଙ୍କ କାର୍ଯ୍ୟଶୈଳୀକୁ ବିଷୟରେ ପ୍ରଶ୍ନ କରିଛନ୍ତି । ସିବିଆଇର ଦୁଇ ପ୍ରମୁଖ ଅଧିକାରୀଙ୍କୁ ଛୁଟିରେ ପଠା ହେବା ନେଇ କଂଗ୍ରେସ ଲଗାତାର କେନ୍ଦ୍ର ସରକାରଙ୍କ ଉପରେ ଆକ୍ରମଣ ଚଳାଇଛି । କେନ୍ଦ୍ର ସରକାର ରାଫେଲ୍ ଚୁକ୍ତର ଯାଞ୍ଚ ଡରରେ ସିବିଆର ନିର୍ଦେଶକ ଆଲୋକ ବର୍ମାଙ୍କୁ ଛୁଟିରେ ପଠାଇଥିବା କଥା କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଅଭିଯୋଗ କରିଛନ୍ତି ।
ନୂଆଦିଲ୍ଲୀ ସ୍ଥିତ ଦଳର ମୁଖ୍ୟାଳୟରେ ରାହୁଲ ଗାନ୍ଧି ଏହି ଅଭିଯୋଗ କରିଛନ୍ତି । ଏବେ ଜଣା ପଡୁଛି ରାଫେଲ୍ ଚୁକ୍ତିରେ କିଛି ଭୁଲ୍ ଭାଲ ହୋଇଛି । ଏଥିପାଇଁ ସିବିଆଇର ମୁଖ୍ୟଙ୍କୁ ହଟାଇବା ପାଇଁ ଉଦ୍ୟମ କରାଯାଉଛି ବୋଲି ରାହୁଲ ଗାନ୍ଧି ଅଭିଯୋଗ କରିଛନ୍ତି । ସିବିଆଇ ମୁଖ୍ୟଙ୍କୁ ହଟାଇବାକୁ ହେଲେ ପ୍ରଧାନମନ୍ତ୍ରୀ , ବିରୋଧି ଦଳ ନେତା ଓ ପ୍ରଧାନ ବିଚାରପତିଙ୍କ କମିଟି ବସି ଏ ବିଷୟରେ ନିଷ୍ପତି ନିଆଯାଇଥାଏ । ମାତ୍ର ସିବିଆଇର ମୁଖ୍ୟଙ୍କୁ ଛୁଟିରେ ପଠାଇବା ସାଧାରଣ ଜନତା ଓ ସମ୍ବିଧାନର ଅପମାନ ବୋଲି ରାହୁଲ ଅଭିଯୋଗ କରିଛନ୍ତି । ଏଥିଯୋଗୁଁ ରାଫେଲ୍ ଚୁକ୍ତିରେ କିଛି ଭୁଲ୍ ହୋଇଥିବା ଜଣାପଡୁଛି ବୋଲି ସେ କହିଛନ୍ତି । ରାତି ଦୁଇଟାରେ ସିବିଆଇ ଉପରେ କାର୍ଯ୍ୟାନୁଷ୍ଠାନ କରାଯାଇଥିଲା । ଏଥିରେ ଭ୍ରଷ୍ଟାଚାରର ବାସ୍ନା ଆସୁଛି ବୋଲି ରାହୁଲ ପ୍ରକାଶ କରିଛନ୍ତି । ଏଥିପାଇଁ ପୂର୍ବତନ ସିବିଆଇ ମୁଖ୍ୟଙ୍କ ଉପରେ ଗୁଇନ୍ଦାଗିରି କରାଯାଉଛି । ଗୋଟିଏ ଅପରାଧକୁ ଲୁଚାଇବା ପାଇଁ ଅନ୍ୟ ଅପରାଧି କରାଯାଉଥିବା ସେ ଅଭିଯୋଗ କରିଛନ୍ତି ।