କାମାକ୍ଷାନଗର: କାମାକ୍ଷାନଗର ବ୍ଲକ ଅନ୍ତର୍ଗତ ଜଗନ୍ନାଥପୁର ପଞ୍ଚାୟତର କଙ୍ଗେଇଲ ଗ୍ରାମରେ ଲକ୍ଷ୍ମୀପୂଜା ଓ ଭସାଣି ଉତ୍ସବ ଶାନ୍ତି ଶୃଙ୍ଖଳାର ସହିତ ସମ୍ପନ୍ନ ହୋଇଛି । କଙ୍ଗେଇଲ ଗ୍ରାମରେ କରୋନା ମହାମାରୀ ଯୋଗୁଁ ଗତ ଦୁଇ ବର୍ଷ ଧରି ଲକ୍ଷ୍ମୀ ପୂଜା ଉତ୍ସବରେ କଟକଣା ଥିବା ବେଳେ ଚଳିତ ବର୍ଷ କଟକଣା ଉଠିବା ପରେ ଲକ୍ଷ୍ମୀପୂଜା ମହା ସମାରୋହରେ ପାଳିତ ହୋଇଯାଇଛି । ଦୀର୍ଘ ୭ଦିନ ଧରି ଅନୁଷ୍ଠିତ ଏହି ପୂଜା ଉତ୍ସବରେ ପଣ୍ଡିତ ବସନ୍ତ ପଣ୍ଡା ଯଥାବିଧି ପୂଜାର୍ଚ୍ଚନା କରିଥିବା ବେଳେ ଶ୍ରୀଧର ସ୍ୱାଇଁ କର୍ତ୍ତା ରୂପେ କାର୍ଯ୍ୟ ସଂମ୍ପାଦନ କରିଥିଲେ ।
ଗ୍ରାମର ସଭାପତି ପ୍ରତାପ ବାରିକ, ସମ୍ପାଦକ ବିକ୍ରମ ସାମଲଙ୍କ ପ୍ରତ୍ୟକ୍ଷ ତତ୍ୱାବଧାନରେ ସୁସଜ୍ଜିତ ପୂଜା ମଣ୍ଡପରେ ମାତା ଲକ୍ଷ୍ମୀଙ୍କର ମୃଣ୍ମୟୀ ମୂର୍ତ୍ତିକୁ ସ୍ୱତନ୍ତ୍ର ପୂଜାର୍ଚ୍ଚନା, ମହାପୂଜା, ହୋମ ଯଜ୍ଞ, ନାମ ସଂକୀର୍ତ୍ତନ କରାଯାଇଥିଲା । ପ୍ରତି ସନ୍ଧ୍ୟାରେ ବିଭିନ୍ନ ପ୍ରକାର ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। କୁନି କୁନି ପିଲାମାନଙ୍କ ଦ୍ୱାରା ସଂଗୀତ ପରିବେଶଷ ହୋଇଥିଲା । ଗ୍ରାମ ଯୁବକ ମାନେ ଦୁଇ ରାତି ନାଟକ ମଞ୍ଚସ୍ଥ କରିଥିଲେ । ୧୫ ତାରିଖ ସନ୍ଧ୍ୟାରେ ଭସାଣି ଉତ୍ସବ ଅନୁଷ୍ଠିତ ହୋଇଥିଲା । ମା’ ଲକ୍ଷ୍ମୀଙ୍କ ମୂର୍ତ୍ତିକୁ ଗ୍ରାମ ପରିକ୍ରମା ପରେ ସ୍ଥାନୀୟ ପୋଖରୀରେ ବିସର୍ଜନ କରାଯାଇଥିଲା । ଗ୍ରାମ କମିଟି ସଦସ୍ୟ ମାନେ ପ୍ରମୁଖ ଭୂମିକା ଗ୍ରହଣ କରିଥିବା ବେଳେ ଗ୍ରାମବାସୀମାନେ ସହାୟତା ପ୍ରଦାନ କରିଥିଲେ ।
