ଟିଟିଆଇଙ୍କ କ୍ୱାର୍ଟର ସମ୍ମୁଖରେ ପତ୍ନୀଙ୍କ ଧାରଣା

ବ୍ରହ୍ମପୁର: ନ୍ୟାୟ ଦାବିରେ ବ୍ରହ୍ମପୁରର ଆଉ ଜଣେ ମହିଳା ନିଜ ସ୍ଵାମୀଙ୍କ ଘର ସମ୍ମୁଖରେ ଧାରଣା ଦେଇଛନ୍ତି । ମହିଳାଙ୍କ ସ୍ବାମୀ ରେଳ ବିଭାଗରେ ଟିଟିଆଇ ଭାବେ କାର୍ଯ୍ୟ କରୁଛନ୍ତି । ଆଜକୁ ୧୨ ବର୍ଷ ତଳେ ଉଭୟଙ୍କ ବିବାହ ହୋଇଥିଲା। ତାଙ୍କର ୨ଟି ପୁଅ ଅଛନ୍ତି । ହେଲେ ଅଧିକ ଯୌତୁକ ଦାବି ଓ ଚରିତ୍ରକୁ ସନ୍ଦେହ କରି ମହିଳାଙ୍କ ସ୍ବାମୀ ଆଜକୁ ୩ ବର୍ଷ ହେବ ତାଙ୍କୁ ଘରୁ ବାହାର କରିଦେଇଛନ୍ତି। ବାରମ୍ବାର ଅନୁରୋଧ ପରେ ମଧ୍ୟ ତାଙ୍କ ସ୍ଵାମୀ ଗ୍ରହଣ କରୁନଥିବାରୁ ସେ ଆଜି ସମାଜସେବୀ ପ୍ରମିଳା ତ୍ରିପାଠୀଙ୍କ ସହଯୋଗରେ ରେଳ ଷ୍ଟେସନ ନିକଟ ସ୍ଵାମୀଙ୍କ କ୍ୱାର୍ଟର ସମ୍ମୁଖରେ ଧାରଣା ଦେଇଛନ୍ତି ବୋଲି ନିର୍ଯ୍ୟାତିତା ମହିଳା ସ୍ଵପ୍ନା ନାୟକ କହିଛନ୍ତି। ପୂର୍ବରୁ ବ୍ରହ୍ମପୁରର ତପସ୍ଵିନୀ ଦାସଙ୍କ ଧାରଣାକୁ ନେଇ ରାଜ୍ୟବ୍ୟାପୀ ଚର୍ଚ୍ଚା ହୋଇଥିବା ବେଳେ ଏବେ ଦେଶିବେହେରା ସାହିରେ ଦୀପିକା ଧାରଣାରତ ଅଛନ୍ତି। ଏଭଳି ସ୍ଥିତିରେ ଜଣେ ସରକାରୀ କର୍ମଚାରୀଙ୍କ ପତ୍ନୀ କ୍ୱାର୍ଟର ସମ୍ମୁଖରେ ଧାରଣା ଦେବା ପୁଣି ଚର୍ଚ୍ଚାର ଖୋରାକ ଯୋଗାଇଛି।