ପୁଲିସ-ମାଓବାଦୀ ଗୁଳି ବିନିମୟ ; ୩ ମାଓବାଦୀ ମୃତ

କୋରାପୁଟ/ଭୁବନେଶ୍ୱର : ମାଓ ଦମନରେ ନିୟୋଜିତ ଥିବା କୋରାପୁଟ ପୁଲିସକୁ ଏକ ବଡ଼ ସଫଳତା ମିଳିଛି। କୋରାପୁଟ ଜିଲା ନାରାୟଣପାଟଣା ବ୍ଲକ ଡୋକରି ଘାଟିରେ ରବିବାର ପୁଲିସ ମାଓବାଦୀ ମୁହାଁମୁହିଁ ହୋଇଛନ୍ତି। ଗୁଳି ବିନିମୟରେ ତିନିଜଣ ମାଓବାଦୀଙ୍କ ମୃତ୍ୟୁ ଘଟିଥିବା ଜଣାଯାଇଛି। ପୁଲିସ ଏକ ମାଓ କ୍ୟାମ୍ପକୁ ଧ୍ୱଂସ କରିଥିବା ସୂଚନା ମିଳିଛି। ମିଳିଥିବା ସୂଚନା ଅନୁଯାୟୀ ଆଜି ଅପରାହ୍ଣରେ କମ୍ବିଂ ଅପରେସନ ଚାଲିଥିବାବେଳେ ପୁଲିସ ମାଓବାଦୀ ପୁଲିସ ମୁହାଁମୁହିଁ ହୋଇଥିଲେ। ଅତିରିକ୍ତ ଏସପି ନିରଞ୍ଜନ ସାହୁଙ୍କ ନେତ୍ୱତ୍ୱରେ ଏହି ଅପରେସନ ଏବେ ବି ଜାରି ରହିଥିବା
ସୂଚନା ମିଳିଛି। ପୁଲିସ ମାଓବାଦୀ ଗୁଳି ବିନିମୟରେ ତିନିଜଣ ମାଓବାଦୀ ନିହତ ହୋଇଥିବା ଜଣାଯାଇଛି। ଡିଭିଏଫ ଓ ଏସଓଜି ଯବାନଙ୍କ ପକ୍ଷରୁ ମିଳିତ ଭାବେ ଏହି ଅପରେସନ ଏବେ ବି ଚାଲିଥିବା ଜଣାଯାଇଛି। ଏ ସମ୍ପର୍କରେ କୋରାପୁଟ ଏସପି ଡାକ୍ତର କନୱର ବିଶାଲ ସିଂଙ୍କ ସହ ଯୋଗାଯୋଗ ପାଇଁ ଚେଷ୍ଟା ସତ୍ତେ୍ୱ ସେ ଫୋନ ନ ଉଠାଇବାରୁ ତାଙ୍କ ପ୍ରତିକ୍ରିୟା ହସ୍ତଗତ ହୋଇପାରିନାହିଁ। ତେବେ ଅତିରିକ୍ତ ଏସପି ଭି.ଆର.ରାଓଙ୍କ ସହ ଯୋଗାଯୋଗ କରିବାରୁ ସେ ମଧ୍ୟ ଏଭଳି ଶୁଣୁଥିବା ସୂଚନା ଦେଇଥିଲେ ହେଁ କୌଣସି ସମ୍ପୂଣ୍ଣ୍ୟ ତଥ୍ୟ ହସ୍ତଗତ ହୋଇ ନ ଥିବା ପ୍ରକାଶ କରିଛନ୍ତି। ତେବେ ଏ ନେଇ ଅତିରିକ୍ତ ମହାନିର୍ଦେଶକ, ଅପରେସନ ଆର.ପି. କୋଚେଙ୍କ ସୂଚନା ଅନୁସାରେ ଏବେ ବି ଅପରେସନ ଚାଲିଛି। ଏହି ଘଟଣାରେ ଅଧିକ ସଂଖ୍ୟାରେ ମାଓବାଦୀଙ୍କ ମୃତାହତ ହୋଇଥିବା ସନ୍ଦେହ କରାଯାଉଥିବା ଶ୍ରୀ କୋଚେ ସୂଚନା ଦେଇଛନ୍ତି। ରାତିର ଅନ୍ଧକାର ଭିତରେ ଏବେ ବି ଗୁଳି ବିନିମୟ ଚାଲିଥିବାବେଳେ ଖାନ ତଲାସିକୁ ଜୋରଦାର କରାଯାଇଥିବା ସେ ପ୍ରକାଶ କରିଛନ୍ତି।