ଲାଞ୍ଜିଗଡ଼: ଲାଞ୍ଜିଗଡ ବ୍ଲକ ପ୍ରଶାସନ ଦ୍ୱାରା ଆରମ୍ଭ ହୋଇଥିବା ସାପ୍ତାହିକ ଅଭିଯୋଗ ଶୁଣାଣି ଓ ସମାଧାନ ଶିବିର ଧିରେଧିରେ ଲୋକପ୍ରିୟ ହେବାରେ ଲାଗିଛି। ଯୁବ ପ୍ରଶାସକ ଜିତେନ୍ଦ୍ର କୁମାର ମିଶ୍ରଙ୍କ କଳ୍ପନା ପ୍ରସୂତ ଏହି କାର୍ଯ୍ୟକ୍ରମ ଦ୍ୱାରା ଲୋକେ ବହୁମାତ୍ରାରେ ଆକୃଷ୍ଟ ହେବା ସହିତ ନିଜ ନିଜର ଆପତ୍ତି ଓ ଅଭିଯୋଗ ଜଣାଇବାକୁ ପ୍ରତି ମଙ୍ଗଳବାର ପଞ୍ଚାୟତ କାର୍ଯ୍ୟାଳୟରେ ରୁଣ୍ଡ ହେଉଥିବା ଦେଖିବାକୁ ମିଳିଛି। ଆଜି ମଙ୍ଗଳବାର ବ୍ଲକ ସମ୍ବିଳନୀ କକ୍ଷଠାରେ ଲାଞ୍ଜିଗଡ ବ୍ଳକ ପ୍ରଶାସନ ପକ୍ଷରୁ ବିଶ୍ୱନାଥପୁର ପଞ୍ଚାୟତର ସାପ୍ତାହିକ ଅଭିଯୋଗ ଶୁଣାଣି ଓ ସମାଧାନ ଶିବିର ଆୟୋଜନ କରାଯାଇଥିବାବେଳେ ପ୍ରଶାସନ ନିକଟରେ ଲୋକେ ସେମାନଙ୍କ ଆପତ୍ତି ଓ ଅଭିଯୋଗ ଜଣାଉଥିବା ଦେଖିବାକୁ ମିଳିଥିଲା।
ବିଶ୍ୱନାଥପୁର ସରପଞ୍ଚ ସୁରଥ ମାଝୀଙ୍କ ତତ୍ତ୍ୱାବଧାନରେ ଆୟୋଜିତ ଶିବିରରେ ଲାଞ୍ଜିଗଡ ବ୍ଲକ ଏବିଡ଼ିଓ ବିଭୁତି ଭୂଷଣ ଶତପଥି ଓ ପଞ୍ଚାୟତ ଅଧୀନରେ ଥିବା ବିଭିନ୍ନ ବିଭାଗର କର୍ମଚାରୀ ମାନେ ଉପସ୍ଥିତ ଥିଲେ। ଏହି ଅବସରରେ ପଞ୍ଚାୟତ ନିର୍ବାହୀ ଅଧିକାରୀ ପ୍ରମୋଦ କୁମାର ସାହୁ କାର୍ଯ୍ୟକ୍ରମଟିକୁ ପରିଚାଳନା କରିଥିଲେ। ଯୋଗାଣ ସହାୟକ ତପନ ଘଡେଇ ସହଯୋଗ କରିଥିଲେ। ପଞ୍ଚାୟତରେ ୯୨ ଜଣ ଲୋକେ ସାମିଲ ହୋଇ ନିଜ ନିଜର ଅଭିଯୋଗ ପ୍ରଶାସନ ନିକଟରେ ଉତ୍ଥାପନ କରିବା ଦେଖିବାକୁ ମିଳିଥିଲା ।ଆବାସ ଯୋଜନାରେ ଘର ଓ ଭତ୍ତା ବାବଦକୁ ଲୋକଙ୍କ ଅଧିକାଂଶ ଅଭିଯୋଗ ରହିଥିଲା।
