ନୂଆଦିଲ୍ଲୀ: ଭାରତର କିମ୍ବଦନ୍ତୀ ମହିଳା କ୍ରିକେଟର ଝୁଲଣ ଗୌସ୍ବାମୀ ଅନ୍ତର୍ଜାତୀୟ କ୍ରିକେଟରୁ ଅବସର ନେବେ। ଐତିହାସିକ ଲର୍ଡସ ଗ୍ରାଉଣ୍ଡରେ ଝୁଲଣ ବିଦାୟୀ ମ୍ୟାଚ ଖେଳିବେ। ଭାରତୀୟ ମହିଳା କ୍ରିକେଟ ଦଳ ସେପ୍ଟେମ୍ବରରେ ଇଂଲଣ୍ଡ ଗସ୍ତରେ ଟ୍ବେଣ୍ଟି୨୦ ଓ ଦିନିକିଆ ମ୍ୟାଚ ଖେଳିବ। ୩ ମ୍ୟାଚ ବିଶିଷ୍ଟ ଟ୍ବେଣ୍ଟି୨୦ ମ୍ୟାଚ ସେପ୍ଟେମ୍ବର ୧୦, ୧୩ ଓ ୧୫ରେ ଏବଂ ଦିନିକିଆ ମ୍ୟାଚ ୧୮, ୨୧ଓ ୨୪ରେ ଖେଳିବ। ଦିନିକିଆ ଦଳରେ ଦ୍ରୁତ ବୋଲର ଝୁଲଣ ଗୌସ୍ବାମୀ ସ୍ଥାନ ପାଇଛନ୍ତି। ସେପ୍ଟେମ୍ବର ୨୪ରେ ଲର୍ଡସରେ ଭାରତ ଶେଷ ଦିନିକିଆ ମ୍ୟାଚ ଖେଳିବ। ଉକ୍ତ ମ୍ୟାଚ ଝୁଲଣଙ୍କ ପାଇଁ ଶେଷ ଅନ୍ତର୍ଜାତୀୟ ତଥା ବିଦାୟୀ ମ୍ୟାଚ ହେବ। ନ୍ୟୁଜିଲାଣ୍ଡରେ େଶଷ ହୋଇଥିବା ଆଇସିସି ମହିଳା ଦିନିକିଆ କ୍ରିକେଟ ବିଶ୍ବକପ-୨୦୨୨ ପରେ ଝୁଲଣ ଅନ୍ତର୍ଜାତୀୟ କ୍ରିକେଟରୁ ଅବସର ନେବା ନେଇ ଯୋଜନା କରିଥିଲେ। ଉକ୍ତ ବିଶ୍ବକପରେ ଦକ୍ଷିଣ ଅାାଫ୍ରିକା ବିପକ୍ଷରେ ଝୁଲଣ ଶେଷ ଥର ପାଇଁ ମ୍ୟାଚ ଖେଳିଥିଲେ। ୩୯ ବର୍ଷୀୟ ଉକ୍ତ କିମ୍ବଦନ୍ତୀ ଦ୍ରୁତ ବୋଲର ଝୁଲଣଙ୍କ ପାଇଁ ବିସିସିଆଇ ସ୍ବତନ୍ତ୍ର ବିଦାୟକାଳୀନ ମ୍ୟାଚ ଆୟୋଜନ ନେଇ ଯୋଜନା କରିଛି। ଏଥିପାଇଁ ଇଂଲଣ୍ଡ ବିପକ୍ଷ ଦିନିକିଆ ଦଳରେ ଝୁଲଣଙ୍କୁ ସ୍ଥାନ ମିଳିଛି। ୨୦୦୫ରେ ଅନ୍ତର୍ଜାତୀୟ କ୍ରିକେଟ ଜୀବନ ଆରମ୍ଭ କରିଥିବା ଝୁଲଣ ୧୭ ବର୍ଷ ମଧ୍ୟରେ ୧୨ଟି ଟେଷ୍ଟ ମ୍ୟାଚ ଖେଳି ୪୪ଟି ୱିକେଟ, ୬୮ଟି ଟ୍ବେଣ୍ଟି୨୦ ମ୍ୟାଚରୁ ୫୬ଟି ୱିକେଟ ଓ ୨୦୧ ଟି ଦିନିକିଆ ମ୍ୟାଚ ଖେଳି ୨୫୨ଟି ୱିକେଟ ନେଇଛନ୍ତି। ଆଇସିିସି ଦିନିକିଆ ମହିଳା କ୍ରିକେଟ ବିଶ୍ବକପରେ ଝୁଲଣ ସର୍ବାଧିକ ୩୯ଟି ୱିକେଟ ନେଇ ନିଜ ନାମରେ କୀର୍ତ୍ତିମାନ ସ୍ଥାପନ କରିଛନ୍ତି। ଏହାଛଡ଼ା ୫ଟି ବିଶ୍ବକପ ୨୦୦୫, ୨୦୦୯, ୨୦୧୩, ୨୦୧୭ ଓ ୨୦୨୨ରେ ଖେଳିଛନ୍ତି।
Popular Categories
Previous article
Next article