କରାଚି: ସପ୍ତାହକ ପରେ ୟୁଏଇରେ ଖେଳାଯିବାକୁ ଥିବା ଏସିଆ କପ୍ ପୂର୍ବରୁ ପାକିସ୍ତାନ କ୍ରିକେଟ୍ ଦଳକୁ ଶକ୍ତ ଧକ୍କା ଲାଗିଛି । ଦଳର ଶ୍ରେଷ୍ଠ ଫାଷ୍ଟବୋଲର ସାହିନ୍ ଶାହା ଆଫ୍ରିଦିଙ୍କ ଆଣ୍ଠୁରେ ଆଘାତ ଲାଗିଥିବାରୁ ସେ ଟ୍ବେଣ୍ଟି୨୦ ଟୁର୍ଣ୍ଣାମେଣ୍ଟ ଏସିଆ କପ୍ରୁ ବାଦ୍ ପଡ଼ିଛନ୍ତି । ଗତମାସରେ ଶ୍ରୀଲଙ୍କା ବିପକ୍ଷ ଟେଷ୍ଟମ୍ୟାଚ୍ରେ ଆଫ୍ରିଦିଙ୍କ ଆଣ୍ଠୁରେ ଆଘାତ ଲାଗିଥିଲା । ଏହାପରେ ଆଫ୍ରିଦି କୌଣସି ମ୍ୟାଚ୍ ଖେଳିନାହାନ୍ତି । ଡାକ୍ତରୀ ଦଳ ତାଙ୍କୁ ପରୀକ୍ଷା କରିବା ପରେ ଘୋଷଣା କରିଛନ୍ତି ଯେ ସୁସ୍ଥହେବା ପାଇଁ ୨୨ ବର୍ଷ ବୟସ୍କ ଆଫ୍ରିଦିଙ୍କୁ ୪ରୁ ୬ ସପ୍ତାହ ସମୟ ଲାଗିବ । ଏସିଆ କପ୍ରେ ପାକିସ୍ତାନକୁ ଭାରତ ବିପକ୍ଷରେ ଅତିକମ୍ରେ ୨ ଥର ଖେଳିବାର ଥିବାରୁ ଆଫ୍ରିଦିଙ୍କ ଅନୁପସ୍ଥିତି ପାକିସ୍ତାନର ବୋଲିଂ ଆକ୍ରମଣକୁ ଦୁର୍ବଳ କରିଦେଇଛି। ଗତ ଟ୍ବେଣ୍ଟି୨୦ ବିଶ୍ବକପ୍ରେ ଆଫ୍ରିଦି ଭାରତ ବିପକ୍ଷରେ ତାଙ୍କ ପ୍ରଥମ ୨ ଓଭରରେ ୨ଟି ସହ ୩୧ ରନ୍ ଦେଇ ୩ଟି ୱିକେଟ ନେଇ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ। ଏହି ମ୍ୟାଚ୍ରେ ଭାରତକୁ ୧୦ ୱିକେଟରେ ପାକିସ୍ତାନ ପରାସ୍ତ କରିଥିଲା।
Popular Categories
Previous article
Next article