ଭୁବନେଶ୍ବର : ଏକ ଅଭାବନୀୟ ଘଟଣାକ୍ରମରେ ଶୁକ୍ରବାର ବିଳମ୍ବିତ ରାତିରେ ଗାଡିଚାଳକଙ୍କ ଆକ୍ରମଣରେ ଇନଫୋସିଟି ଥାନାର ଡିସିଓ ଲହୁଲୁହାଣ ହୋଇଛନ୍ତି। ନନ୍ଦନ ବିହାର ଛକରେ ଏକ ହାଇୱା ଓ କାର ମଧ୍ୟରେ ଦୁର୍ଘଟଣା ଘଟିଥିଲା। ଏଥିରେ ଉତ୍ତେଜିତ ହୋଇ କାରରେ ଥିବା ୨ ଯୁବକ ହାଇୱା ଚାଳକ ଓ ହେଲପରକୁ ଗାଳିଗୁଲଜ କରିବ ସହ ମାରଧର କରୁଥିଲେ । ଏହା ଦେଖି ସ୍ଥାନୀୟ ଲୋକ ପୁଲିସ ନିୟନ୍ତ୍ରଣ କକ୍ଷକୁ ଖବର ଦେଇଥିଲେ। ଖବର ପାଇ ଇନଫୋସିଟି ଥାନାର କର୍ମଚାରୀ ଓ ଡିସିଓ ସେଠାରେ ପହଞ୍ଚି ୨ ଯୁବକଙ୍କୁ ଥାନାକୁ ଆଣିଥିଲେ।
ଥାନାରେ ସେମାନଙ୍କୁ ବସାଇ ଘଟଣା ସଂପର୍କରେ ପଚରାଉଚରା କରିବା ବେଳେ ସେମାନଙ୍କ ମଧ୍ୟରୁ ଜଣେ ମୋବାଇଲରେ ଏହାର ଭିଡିଓ ରେକଡିଂ କରୁଥିଲେ । ତେବେ ଥାନାର ଡିସିଓ ଅଜୟ ଲେଙ୍କା ଏହାର ପ୍ରତିବାଦ କରିଥିଲେ ଓ ରେକଡିଂ ପାଇଁ ବାରଣ କରିଥିଲେ। ଏଥିରେ ଉତକ୍ଷିପ୍ତ ହୋଇ ଯୁବକ ଦ୍ବୟ ଶ୍ରୀ ଲେଙ୍କାଙ୍କ ଉପରେ ଆକ୍ରମଣ କରିଥିଲେ । ଏପରି କି ସେମାନେ ଶ୍ରୀ ଲେଙ୍କାଙ୍କୁ ତଳେ ପକାଇ ତାଙ୍କ ଉପରେ ଚଢି ଯାଇ ଜୀବନରୁ ମାରି ଦେବାର ପ୍ରୟାସ କରିଥିଲେ। ଗୋଇଠା ଓ ଲାତ ମାରି ତାଙ୍କୁ ଲହୁ ଲୁହାଣ କରିଦେଇଥିଲେ। ଏହି ସମୟରେ ସେଠାରେ ଉପସ୍ଥିତ ମହିଳା କନେଷ୍ଟବଳ ପାଟି କରି ଅନ୍ୟମାନଙ୍କୁ ଡାକିଥିଲେ। ଉପର ବାରାକରେ ଥିବା କର୍ମଚାରୀମାନେ ଆସି ଶ୍ରୀ ଲେଙ୍କାଙ୍କୁ ଉଦ୍ଧାର କରିଥିଲେ।
ଯୁବକ ଦ୍ବୟଙ୍କୁ ଥାନାରେ ଅଟକ ରଖାଯାଇଛି । ଶନିବାର ସେମାନଙ୍କୁ ବିରୋଧରେ ମାମଲା ରୁଜୁ କରାଯାଇ ଅଦାଲତରେ ହାଜର କରାଯିବ।
