ନର୍ଲା :କଳାହାଣ୍ଡି ଜିଲ୍ଲା ନର୍ଲା ବ୍ଲକ ବେହେରାପାଟି ଉଚ୍ଚ ପ୍ରାଥମିକ ବିଦ୍ୟାଳୟରେ ଶୁକ୍ରବାର ଛାତ୍ରଛାତ୍ରୀ, ଅଭିଭାବକ ଓ ସ୍କୁଲ ପରିଚାଳନା କମିଟି ସଦସ୍ୟ ତାଲା ପକାଇ ଦୁଇଜଣ ଶିକ୍ଷୟତ୍ରୀଙ୍କ ବଦଳି ଦାବି କରିଛନ୍ତି। ସୂଚନା ମତେ ନର୍ଲା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟରୁ ଅନତି ଦୂରରେ ଥିବା ବେହେରାପାଟି ଉଚ୍ଚ ପ୍ରାଥମିକ ବିଦ୍ୟାଳୟରେ ଗତ ବହୁ ବର୍ଷ ଧରି ଦୁଇଜଣ ଶିକ୍ଷୟିତ୍ରୀ ଅବସ୍ଥାପିତ ରହି ବର୍ତ୍ତମାନ କାର୍ଯ୍ୟକ୍ଷେତ୍ରରେ ଚରମ ଅବହେଳା କରିଆସୁଛନ୍ତି।
କର୍ତ୍ତୃପକ୍ଷଙ୍କୁ ଗତ ସାତ ମାସ ଧରି ଏବିଷୟରେ ଅଭିଭାବକ ଓ ପରିଚାଳନା କମିଟି ଅଭିଯୋଗ କରି ଆସୁଥିଲେ ହେଁ ବିଭାଗୀୟ ଅଧିକାରୀ ଏଦିଗରେ କୈାଣସି ପଦକ୍ଷେପ ଗ୍ରହଣ କରିନାହାଁନ୍ତି। ଫଳରେ ଶୁକ୍ରବାର ବିଦ୍ୟାଳୟ ଗେଟରେ ତାଲା ପକାଇ ଛାତ୍ରଛାତ୍ରୀ, ଅଭିଭାବକ ଓ ପରିଚାଳନା କମିଟି ସଦସ୍ୟମାନେ ଶିକ୍ଷୟିତ୍ରୀ ଆହ୍ଲାଦିନୀ ପଣ୍ଡା ଓ ସୁନିତା ପାଣିଗ୍ରାହୀଙ୍କ ବଦଳି ଦାବି କରିଛନ୍ତି। ଉକ୍ତ ଶିକ୍ଷୟତ୍ରୀ ମାନଙ୍କ ଅନଧିକୃତ ଅନୁପସ୍ଥିତି ଏବଂ ଛାତ୍ରଛାତ୍ରୀ, ଅଭିଭାବକ ଓ ପରିଚାଳନା କମିଟି ସଦସ୍ୟଙ୍କୁ ଦୁର୍ବ୍ୟବହାର ପ୍ରଦର୍ଶନ କରି ଆସୁଥିବା ଗାଁ ଲୋକେ ଅଭିଯୋଗ କରିଛନ୍ତି। ଦୀର୍ଘ ସମୟଧରି ବିଦ୍ୟାଳୟ ବନ୍ଦ ରହିବା ପରେ ବିଇଓ ତପିମଣି ଜାନୀ,ଏବିଇଓ ଗୋବର୍ଦ୍ଧନ ମାଝୀ ଉପସ୍ଥିତ ରହି ଆଲୋଚନା କରିଥିଲେ। ଉଭୟ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି କରିବାକୁ ଅଧିକାରୀ ମାନଙ୍କ ପ୍ରତିଶ୍ରୁତି ପରେ ଆନ୍ଦୋଳନକାରୀମାନେ ବିଦ୍ୟାଳୟ ଖୋଲିଥିଲେ। ଉଭୟ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି କରି ତାଙ୍କ ସ୍ଥାନରେ ଅନ୍ୟ ଶିକ୍ଷକଙ୍କୁ ନିଯୁକ୍ତି ଦିଆଯିବା ପାଇଁ ଜିଲ୍ଲା ଶିକ୍ଷାଧିକାରୀ ଙ୍କୁ ଜଣାଇଥିବା ବିଇଓ ଶ୍ରୀ ଜାନୀ ସୂଚନା ଦେଇଛନ୍ତି।
