ଚୌଦ୍ୱାର: ଚୌଦ୍ୱାର ପୌରପାଳିକା ୮ନମ୍ବର ୱାର୍ଡ଼ ଓଟିଏମ୍ ପଡ଼ିଆସ୍ଥିତ ବ୍ୟଘ୍ରବାହିନୀ ମନ୍ଦିରରୁ ସୋମବାର ରାତିରେ ଚୋରି ହୋଇଥିବା ଥାନାରେ ଅଭିଯୋଗ ହୋଇଛି। ମନ୍ଦିର ପରିଚାଳାନା କମିଟି ସଭାପତି ସତ୍ୟ ନାରାୟଣ ଦାସ ଥାନାରେ କରିଥିବା ଅଭିଯୋଗରୁ ପ୍ରକାଶ ଯେ ମଙ୍ଗଳବାର ସକାଳେ ମନ୍ଦିର ପୂଜକ ଦେବୀଙ୍କ ପୂଜା କରିବା ପାଇଁ ଆସି ମନ୍ଦିର ଗେଟ ତାଲାଭଙ୍ଗା ଯାଇଥିବା ଦେଖିବାକୁ ପାଇଥିଲେ। ଦୁର୍ବୁତ୍ତମାନେ ମନ୍ଦିର ଭିତରେ ପଶି ଦେବୀଙ୍କ ଅଳଙ୍କାର ସହିତ ରୂପା ମୁକୁଟ ଓ ଦାନବାକ୍ସ ଚୋରେଇ ନେଇଥିବା ପୂଜକ ଦେଖିବାକୁ ପାଇଥିଲେ। ଖୋଜାଖୋଜି ପରେ ଦାନ ବାକ୍ସଟି ଖୋଲାହୋଇ ମନ୍ଦିରର ଅନତି ଦୂରରେ ପଡ଼ିଥିବା ଦେଖିବାକୁ ମିଳିଥିଲା।
ଖବରପାଇ ଚୌଦ୍ୱାର ପୁଲିସ୍ ତଦନ୍ତକାରୀ ଦଳ ସହିତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ସୂଚନାଯୋଗ୍ୟ ଯେ ଗତ କିଛିଦିନ ତଳେ ଦୁର୍ବୁତ୍ତ ମାନେ ଅନୁରୂପ ଭାବେ ମନ୍ଦିରର ତାଲା ଭାଙ୍ଗି ମନ୍ଦିର ଦାନବାକ୍ସକୁ ନେଇଯାଇ ମନ୍ଦିର ବେଢ଼଼ାରେ ପକାଇ ଦେଇଥିଲେ। ଉଭୟ ଚୋରି ସ୍ଥାନୀୟ କୌଣସି ଦୁର୍ବୁତ୍ତଦ୍ୱାରା କରାଯାଇଥିବା ପୁଲିସ ସନ୍ଦେହ କରୁଛି।ମନ୍ଦିର ବେଢ଼଼ା ଓ ଏଥି ସଂଳଗ୍ନ ରାସ୍ତାରେ ଆଲୋକ ବ୍ୟବସ୍ଥା ନଥିବାରୁ ସଂଧ୍ୟାପରେ ମନ୍ଦିର ଓ ଏହାର ଚତୁର୍ପାଶ୍ୱ ଅନ୍ଧାର ରହୁଥିବାରୁ ସେଠାରେ ଅସାମାଜିକଙ୍କ ଆଡ୍ଡା ଜମିବା ସହିତ ମନ୍ଦିରରୁ ବାରମ୍ବାର ଚୋରି ହେଉଥିବା ସ୍ଥାନୀୟ ଲୋକେ ଅଭିଯୋଗ କରି ତୁରନ୍ତ ମନ୍ଦିର ଚତୁର୍ପାଶ୍ୱରେ ଆଲୋକ ବ୍ୟବସ୍ଥା କରିବା ପାଇଁ ଦାବି କରିଛନ୍ତି।
