ମୁମ୍ବାଇ: ଦକ୍ଷିଣ ଭାରତୀୟ ସିନେତାରକା କମଲ ହାସନଙ୍କ ବହୁପ୍ରତୀକ୍ଷିତ ଚଳଚ୍ଚିତ୍ର ‘ବିକ୍ରମ’ର ତାମିଲ ଟ୍ରେଲର ନିକଟରେ ରିଲିଜ୍ ହୋଇଥିଲା। ଏବେ ଏହାର ଟ୍ରେଲରକୁ ହିନ୍ଦୀରେ ମଧ୍ୟ ରିଲିଜ୍ କରାଯାଇଛି। ପ୍ରଶଂସକ ଏହି ଫିଲ୍ମକୁ ନେଇ ଖୁବ୍ ଉତ୍ସାହିତ ଅଛନ୍ତି ଏବଂ ବର୍ତ୍ତମାନ ସମୟରେ ଦକ୍ଷିଣ ଭାରତୀୟ ଚଳଚ୍ଚିତ୍ରର ହିନ୍ଦୀ ଭର୍ସନକୁ ଦର୍ଶକଙ୍କ ବହୁତ ଭଲ ପ୍ରତିକ୍ରିୟା ମିଳୁଛି। ତେଣୁ ଅଧିକାଂଶ ଫିଲ୍ମକୁ ତାମିଲ ସହ ହିନ୍ଦୀରେ ମଧ୍ୟ ମୁକ୍ତିଲାଭ କରାଯାଉଛି। ଏଥିପାଇଁ ନିର୍ମାତା ହିନ୍ଦୀ ଦର୍ଶକଙ୍କୁ ଦୃଷ୍ଟିରେ ରଖି ‘ବିକ୍ରମ’ର ଟ୍ରେଲରକୁ ମଧ୍ୟ ହିନ୍ଦୀରେ ରିଲିଜ୍ କରିଛନ୍ତି। ଏଥିରେ ଆକ୍ସନ ସାଙ୍ଗକୁ ଜବରଦସ୍ତ ସଂଳାପ ରହିଛି। ଦୀର୍ଘ ୪ ବର୍ଷ ପରେ ଦର୍ଶକ ପୁଣି କମଲ ହାସନକୁ ପରଦାରେ ଦେଖିବାକୁ ପାଇବେ, ସେ ପୁଣି ଆକ୍ସନ ଅବତାରରେ।
‘ବିକ୍ରମ’ରେ କମଲ ହାସନଙ୍କ ବ୍ୟତୀତ ବିଜୟ ସେତୁପତି, ଫହଦ ଫାସିଲଙ୍କ ଭଳି ଲୋକପ୍ରିୟ କଳାକାରଙ୍କୁ ଦେଖିବାକୁ ମିଳିବ। ଏଥିସହ ଅଭିନେତା ସୂର୍ଯ୍ୟା ଫିଲ୍ମରେ ଅତିଥି କଳାକାର ଭାବେ ନଜର ଆସିବେ ବୋଲି ଶୁଣିବାକୁ ମିଳିଛି। ଲୋକେଶ କନଗରାଜଙ୍କ ଦ୍ବାରା ଲିଖିତ ଓ ନିର୍ଦେଶିତ ଏହି ଆକ୍ସନ ଥ୍ରୀଲର ଚଳଚ୍ଚିତ୍ରକୁ ‘ରାଜ କମଲ ଫିଲ୍ମ୍ସ ଇଣ୍ଟରନେସନାଲ’ ବ୍ୟାନରରେ ନିର୍ମାଣ କରାଯାଇଛି। ଜୁନ୍ ୩ ତାରିଖରେ ପରଦାକୁ ଆସିବ ‘ବିକ୍ରମ’।
