ନୂଆଦିଲ୍ଲୀ: କେରଳର ସାବରୀମାଳା ମନ୍ଦିରରେ ସବୁ ବୟସର ମହିଳାଙ୍କ ପ୍ରବେଶ ମାମଲାରେ ଶୁକ୍ରବାର ସୁପ୍ରିମକୋର୍ଟଙ୍କ ପାଞ୍ଚ ଜଣିଆ ସାମ୍ବିଧାନିକ ଖଣ୍ଡପୀଠରେ ଶୁଣାଣି ହୋଇଛି । ସାବରୀମାଳା ମନ୍ଦିରରେ ମହିଳାଙ୍କ ପ୍ରବଶେକୁ ନେଇ ପୂର୍ବରୁ ଲାଗିଥିବା କଟକଣାକୁ ସୁପ୍ରିମକୋର୍ଟ ହଟାଇ ଦେଇଛନ୍ତି । ସୁପ୍ରିମକୋର୍ଟର ଏହି ଐତିହାସିକ ରାୟ ପରେ ସାବରୀମାଳା ମନ୍ଦିରର କବାଟ ସବୁ ବୟସର ମହିଳାଙ୍କ ପାଇଁ ଖୋଲା ହୋଇଯାଇଛି । ପ୍ରଧାନ ବିଚାରପତି ଦୀପକ ମିଶ୍ର, ଜଷ୍ଟିସ୍ ଖନବିଲକର, ଜଷ୍ଟିସ୍ ଚନ୍ଦ୍ରଚୂଡ, ଜଷ୍ଟିସ୍ ଇନ୍ଦୁ ମଲହୋତ୍ରା ଏବଂ ଜଷ୍ଟିସ୍ ନରୀମନଙ୍କ ପାଞ୍ଚ ଜଣିଆ ଖଣ୍ଡପୀଠରେ ଏହି ନିଷ୍ପତି ନିଆଯାଇଛି।
ସୂଚନାଯୋଗ୍ୟ, ପୂର୍ବରୁ ୧୦ରୁ ୫୦ବର୍ଷୀୟ ମହିଳାଙ୍କୁ ମନ୍ଦିର ମଧ୍ୟକୁ ପ୍ରବେଶ କରିବାରେ କଟକଣା କରାଯାଇଥିଲା। ଭାଗବାନଙ୍କ ସହ ଭକ୍ତଙ୍କ ସମ୍ବନ୍ଧକୁ ଜୈବିକ କିମ୍ବା ଶାରୀରିକ ଦୃଷ୍ଟିରୁ ମାପ କରାଯିବା ଏବଂ ପୂଜାର୍ଚ୍ଚନାକୁ ନେଇ ଭେଦଭାବ କରିବା ଅନୁଚିତ୍ । ଏହା ସମସ୍ତଙ୍କର ମୌଳିକ ଅଧିକାର ଏବଂ ଏହି କଟକଣା ମହିଳାଙ୍କ ଅଧିକାରକୁ କ୍ଷୁର୍ଣ୍ଣ କରୁଛି ବୋଲି ମୁଖ୍ୟ ବିଚାରପତି ଦୀପକ ମିଶ୍ର କହିଛନ୍ତି ।
