ଶ୍ରୀମନ୍ଦିର ପରିଚାଳନା କମିଟି ବୈଠକ ଶେଷ : ସାର୍ବଜନୀନ ହେବ ନାହିଁ ବ୍ରହ୍ମ ବିଭ୍ରାଟ ରିପୋର୍ଟ

ପୁରୀ : ଶ୍ରୀମନ୍ଦିର ପରିଚାଳନା କମିଟିର ଗୁରୁତ୍ୱପୂର୍ଣ୍ଣ ବୈଠକ ଶେଷ ହୋଇଛି। ଏଥିରେ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ ଆଲୋଚନା କରାଯାଇଛି। ବୈଠକ ସରିବା ପରେ ଶ୍ରୀମନ୍ଦିରର ମୁଖ୍ୟ ପ୍ରଶାସକ ପ୍ରଦୀପ୍ତ ମହାପାତ୍ର ଦେଇଥିବା ସୂଚନା ଅନୁସାରେ, ନବକଳେବର ସମୟରେ ହୋଇଥିବା ବ୍ରହ୍ମ ବିଭ୍ରାଟର ରିପୋର୍ଟକୁ ସାର୍ବଜନୀନ କରାଯିବ ନାହିଁ। ଏନେଇ ଆରଟିଆଇରେ ତଥ୍ୟ ମାଗିଲେ ମଧ୍ୟ ମିଳିବ ନାହିଁ। ଏହା ଏକ ସମ୍ବେଦନଶୀଳ ପ୍ରସଙ୍ଗ ହୋଇଥିବାରୁ ସାର୍ବଜନୀନ କରାଯିବ ନାହିଁ ବୋଲି ନିଷ୍ପତ୍ତି ନିଆଯାଇଛି। ବ୍ରହ୍ମ ବିଭ୍ରାଟରେ ସମ୍ପୃକ୍ତ ଥିବା ୧୦ ରୁ ୧୫ ଜଣ ସେବକଙ୍କ ବିରୋଧରେ ଶ୍ରୀମନ୍ଦିର ପ୍ରଶାସନ ଆଇନ ୨୧(ଖ) ଅନୁସାରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯିବ। କାରଣ ଦର୍ଶାଅ ନୋଟିସ ଜାରି ହେବା ସହ ୩ମାସ ମଧ୍ୟରେ କାର୍ଯ୍ୟାନୁଷ୍ଠାନ ହେବ। ଏହାବ୍ୟତୀତ ଅକ୍ଟୋବର ୧ରୁ ଧାଡ଼ି ଦର୍ଶନ ବ୍ୟବସ୍ଥା ଆରମ୍ଭ ହେବ। ଏଣିକି ନିୟମିତ ବ୍ୟବଧାନରେ ଦାନ ସୁନା ବ୍ୟାଙ୍କକୁ ଯିବ। ଶ୍ରୀମନ୍ଦିର କର୍ମଚାରୀ ସଂଖ୍ୟା ହ୍ରାସ କରାଯିବାକୁ ମଧ୍ୟ ନିଷ୍ପତ୍ତି ନିଆଯାଇଛି। ଶ୍ରୀମନ୍ଦିର ବାହାରେ ୪ଟି ହୁଣ୍ଡି ଲାଗିବ ବୋଲି ମଧ୍ୟ ସେ କହିଛନ୍ତି। ଭିତରକାଠ ଓ ବାହାରକାଠ ମଧ୍ୟରେ ୨ଟି ଦାନବାକ୍ସ ରହିବ। ଶ୍ରୀମନ୍ଦିରରେ ଷୋହଳ ପୂଜା ନୀତିର ମଧ୍ୟ ସମୀକ୍ଷା କରାଯାଇଛି। ଏଥିସହିତ ଶ୍ରୀମନ୍ଦିରରେ ଶୃଙ୍ଖଳା ଉପରେ ମଧ୍ୟ ଆଲୋଚନା କରାଯାଇଛି।