ନୂଆଦିଲ୍ଲୀ : ଜବାହାରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ)ର ଆଉ ଦୁଇ ଜଣ ପ୍ରଫେସରଙ୍କ ବିରୋଧରେ ଯୌନ ନିର୍ଯ୍ୟାତନା ଅଭିଯୋଗ ଆସିଛି । ଜେଏନୟୁର ସେଣ୍ଟର ଫର ସାଉଥ ଏସିଆନ (ଦକ୍ଷିଣ ଏସିଆ) ଷ୍ଟଡିଜ୍ର ଜଣେ ପିଏଚ୍ଡି ଛାତ୍ରୀ ସେହି ବିଭାଗର ୨ ପ୍ରଫେସରଙ୍କ ବିରୋଧରେ ଏହି ଅଭିଯୋଗ କରିଛନ୍ତି । ଏନେଇ ଛାତ୍ରୀ ଜଣକ ଜାନୁଆରୀ ୮ରେ ଭାଇସ ଚାନ୍ସେଲର ପ୍ରଫେସର ଏମ୍ ଜଗଦିଶ କୁମାର, ବିଶ୍ୱବିଦ୍ୟାଳୟର ଆଭ୍ୟନ୍ତରୀଣ ଅଭିଯୋଗ ସମିତି (ଆଇସିସିସି)ର ସଭାପତି ବିଭା ଟଣ୍ଡନକୁ ସାକ୍ଷାତ କରି ୨ ପ୍ରଫେସରଙ୍କ ବିରୋଧରେ ଲିଖିତ ଭାବେ ଯୌନ ନିର୍ଯାତନା ଅଭିଯୋଗ କରିଥିଲେ । ଛାତ୍ରୀ ଜଣକ ନିଜ ଅଭିଯୋଗପତ୍ରରେ ପ୍ରଫେସର ଦ୍ୱୟଙ୍କୁ ନିଲମ୍ବନ କରିବା ସହ ନିରପେକ୍ଷ ତଦନ୍ତ କରିବାକୁ ଦାବି କରିଛନ୍ତି । ଏହି ଦୁଇ ପ୍ରଫେସର ସେଣ୍ଟର ଫର ଏସିଆନ ଷ୍ଟଡିଜର ଇଣ୍ଟରଭ୍ୟୁ (ସାକ୍ଷାତକାର) ପ୍ୟାନେଲରେ ଅଛନ୍ତି । ପ୍ରଫେସର ଦ୍ୱୟ ନିଜ ବିରୋଧରେ ଆସିଥିବା ଅଭିଯୋଗକୁ ଖଣ୍ଡନ କରିବା ସହ ଭିତ୍ତିହୀନ କହିଛନ୍ତି । ପ୍ରଫେସର ଦ୍ୱୟ କହିଛନ୍ତି ଯେ ଛାତ୍ର ଜଣକ ୪ ବର୍ଷ ହେବ ନିଜ ପିଏଚ୍ଡି ଥେସିସି ଜମା କରିନଥିଲେ । ତାଙ୍କୁ କ୍ୟାମ୍ପସ ଛାଡ଼ି ବାହାରକୁ ଯିବାକୁ କୁହାଯିବା ପରେ ସେ ଏଭଳି ଅଭିଯୋଗ ଆଣିଛନ୍ତି ।
