ବିଶାଖପାଟଣା: କିଛି ଦିନର ବ୍ୟବଧାନ ପରେ ପୁଣି ମାଓବାଦୀଙ୍କ ଲାଲ ତାଣ୍ଡବ ଦେଖିବାକୁ ମିଳିଛି । ଆନ୍ଧ୍ରପ୍ରଦେଶର ଦୁଇ ଜଣ ଲୋକ ପ୍ରତିନିଧିଙ୍କୁ ମାଓବାଦୀମାନେ ହତ୍ୟା କରିଥିବା ଅଭିଯୋଗ ହୋଇଛି। ଟିଡିପି ବିଧାୟକ କେ.ସର୍ବେଶ୍ବର ରାଓ ଏବଂ ପୂର୍ବତନ ଟିଡିପି ବିଧାୟକ ଶିବେରି ସୁମାଙ୍କୁ ମାଓବାଦୀମାନେ ଗୁଳି କରି ହତ୍ୟା କରିଛନ୍ତି । ଡୁମୁରିଗୁଡାରେ ଏକ ବିବାହ ଭୋଜିରେ ଯୋଗଦେଇ ଫେରୁଥିବା ବେଳେ ତଟାଙ୍ଗୀ ନିକଟରେ ପ୍ରାୟ ୬୦ ଜଣ ମାଓବାଦୀ ସଂଘବଦ୍ଧ ଭାବେ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ ଉଭୟଙ୍କ ମୃତ୍ୟୁ ଘଟିଛି । ମାଓନେତା ରାମକୃଷ୍ଣ ଓ ଦଳପତିଙ୍କ ନେତୃତ୍ତ୍ବରେ ନକ୍ସଲମାନେ ଏହି ସଙ୍ଘବଦ୍ଧ ଆକ୍ରମଣ କରିଥିବା ସୂଚନା ମିଳିଛି ।
ଓଡିଶାରେ ହାଇ ଆଲର୍ଟ ଜାରି
ଆନ୍ଧ୍ରପ୍ରଦେଶର ଏହି ଘଟଣା ପରେ ଓଡିଶାରେ ହାଇଆଲର୍ଟ ଜାରି କରାଯାଇଛି । ଓଡିଶାର ଆଇଜି(ଅପରେସନ୍) ଆରପି କୋଚେଙ୍କ ସୂଚନା ଅନୁଯାୟୀ ଓଡିଶା ସୀମାନ୍ତରେ ବିଏସଏପ, ସିଆରପିଏଫ, ଏସଓଜି ଯବାନଙ୍କୁ ସତର୍କ ରହିବାକୁ ନିର୍ଦେଶ ଦିଆଯାଇଛି । ସାଧାରଣତଃ ନକ୍ସଲମାନେ ଏକ ବଡ ଧରଣର ହିଂସାକାଣ୍ଡ ଘଟାଇଲା ପରେ ପଡୋଶୀ ରାଜ୍ୟର ସୀମା ଅତିକ୍ରମ କରି ଚାଲିଯିବାର ଦୃଷ୍ଟାନ୍ତ ରହିଛି । ଆନ୍ଧ୍ରପ୍ରଦେଶରେ ହତ୍ୟାକାଣ୍ଡ ପରେ ନକ୍ସଲମାନେ ଦକ୍ଷିଣ ଓଡିଶାକୁ ଅନୁପ୍ରବେଶ କରିବାର ଆଶଙ୍କା କରାଯାଉଛି ।
ଟିଡିପି ବିଧାୟକ କେ.ସର୍ବେଶ୍ବର ରାଓ ଏବଂ ପୂର୍ବତନ ଟିଡିପି ବିଧାୟକ ଶିବେରି ସୁମାଙ୍କୁ ମାଓବାଦୀମାନେ ଗୁଳି କରି ହତ୍ୟା କରିବା ଖବର ପ୍ରସାରିତ ହେବା ପରେ ତାଙ୍କର ସମର୍ଥକମାନେ ସେଠାରେ ଥିବା ଆରକୁ ଥାନାକୁ ଜାଳି ଦେଇଥିବା ସୂଚନା ମିଳିଛି । ଏହା ସହ ଶବକୁ ରାସ୍ତାରେ ରଖି ରାସ୍ତା ରୋକ କରିଥିଲେ ।ପୁଲିସ ଏମାନଙ୍କୁ ଉପଯୁକ୍ତ ସୁରକ୍ଷା ଦେବାରେ ଅସମର୍ଥ ହେବାରୁ ମାଓବାଦୀମାନେ ଏହି ଦୁଇ ନେତାଙ୍କୁ ହତ୍ୟା କରିଥିବା ଅଭିଯୋଗ ହୋଇଛି ।
Reaction of #Araku MLA murder- mob attack police station in #Araku. pic.twitter.com/VJ1UTacrXE
— dinesh akula (@dineshakula) September 23, 2018
