ମୁଖୀଗୁଡା: ଅଭିଯୁକ୍ତକୁ ଧରିବାକୁ ଯାଇ ଜୟପାଟଣା ଥାନାଧିକାରୀ ଆକ୍ରମଣର ଶିକାର ହୋଇଛନ୍ତି। ମୂଖିଗୁଡା ଓ ଏଚପିସି କଲୋନୀ ମଧ୍ୟରେ ରହୁଥିବା ଜଣେ କର୍ମଚାରୀ ଅନ୍ୟ ଦୁଇ ଜଣଙ୍କ ଉପରେ ମରଣାନ୍ତକ ଆକ୍ରମଣ କରିଥିବା ଜୟପାଟଣା ଥାନାରେ ସୂଚନା ଦିଆଯାଇଥିଲା। ସୂଚନା ପାଇ ଜୟପାଟଣା ଥାନା ଅଧିକାରୀ ସଦଳବଳେ ଅଭିଯୁକ୍ତଙ୍କୁ ଧରିବାକୁ ଯାଇଥିବା ବେଳେ ତାର ଆକ୍ରମଣରେ ଅଧିକାରୀ ମଧ୍ୟ ଆକ୍ରମଣର ଶିକାର ହୋଇଥିବା ଜଣାପଡିଛି। ସୂଚନାରୁ ପ୍ରକାଶ ଯେ ମୂଖିଗୁଡା ଓ ଏଚପିସିରେ କାର୍ଯ୍ୟରତ କୁଳମଣି ରଥ ଓ ତାଙ୍କ ପୁଅ ପୂର୍ଣ୍ଣ ଚନ୍ଦ୍ର ରଥ ସନ୍ଧ୍ୟା ସମୟରେ ପାରିବାରିକ କଳହକୁ କେନ୍ଦ୍ର କରି ପଡୋଶୀ କାଲି ଚରଣ ଭୂଇଁଆଁ ଓ ପୁଅ ଦୁତି କୃଷ୍ଣଙ୍କ ଉପରେ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ।
ଉଭୟ ଗୁରୁତର ଅବସ୍ଥାରେ ଥାଇ ଜୟପାଟଣା ଥାନାରେ ରିପୋର୍ଟ ଦେବା ପରେ ରାତି ୮ଟା ବେଳେ ଥାନାଧିକାରୀ ବାସୁଦେବ ଛତ୍ରିଆ ଦଳ ବଳ ନେଇ ଅଭିଯୁକ୍ତଙ୍କ ଘରେ ପହଁଚିଲା ବେଳକୁ କୂଳମଣି ପ୍ରଥମେ ଗରମ ପାଣି ଫିଙ୍ଗି ଥିଲା ଏବଂ ପରେ ଏକ ଧାରୁଆ ଅସ୍ତ୍ରରେ ଥାନା ଅଧିକାରୀଙ୍କ ମୁହଁରେ ଆକ୍ରମଣ କରିଥିଲା। ଥାନା ଅଧିକାରୀ ଜୟପାଟଣା ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ କାଳୀ ଚରଣ ଭୂଇଁଆଁଙ୍କ ଅବସ୍ଥା ଉଦବେଗଜନକ ଥିବାରୁ ଭବାନୀପାଟଣା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ତାଙ୍କ ପୁଅ ହାତରେ ଶକ୍ତ ଆଘାତ ଲାଗିଛି। ଥାନାଧିକାରୀ ଆହତ ଥିବା ସତ୍ୱେ ଦୁଇ ଅଭିଯୁକ୍ତଙ୍କୁ କାବୁ କରି ଥାନାରେ ଅଟକ ରଖିଥିବା ସୂଚନାରୁ ପ୍ରକାଶ। ଗତକାଲି ବାସୁଦେବ ଛତ୍ରୀଆ ଜୟପାଟଣା ଥାନାରେ ଯୋଗ ଦେଇଥିଲେ।
