ଭୁବନେଶ୍ୱର: ବିଭିନ୍ନ କ୍ଷେତ୍ରରେ ଉତ୍କର୍ଷତା ହାସଲ କରିଥିବା ଓଡ଼ିଶା ଖଣି ନିଗମକୁ ପୁଣି ଏକ ସମ୍ମାନ ମିଳିଛି। କରୋନା ମହାମାରୀ ସମୟରେ ଶିଳ୍ପାନୁଷ୍ଠାନଗୁଡିକର ସାମାଜିକ ଦାୟିତ୍ବବୋଧ (ସିଏସଆର)କାର୍ଯ୍ୟକ୍ରମରେ ଉତ୍ତମ ପ୍ରଦର୍ଶନ ଲାଗି ଏସିଆ ମହାଦେଶର ଅଗ୍ରଣୀ ଅନୁଷ୍ଠାନ ‘ପିପୁଲ ଫାଷ୍ଟ’ ପକ୍ଷରୁ ‘ମାନବସମ୍ବଳ ଏକ୍ସଲେନ୍ସ ଆୱାର୍ଡ -୨୦୨୧’ ହାସଲ କରିଛି। ଖଣି ନିଗମ ପକ୍ଷରୁ କରୋନାର ମୁକାବିଲା ପାଇଁ ନିଆଯାଇଥିବା ପଦକ୍ଷେପ ଯୋଗୁଁ ଶିଳ୍ପାନୁଷ୍ଠାନରେ କାର୍ଯ୍ୟସ୍ଥଳରେ ବହୁ ମାତ୍ରାରେ କରୋନାକୁ ପ୍ରତିହତ କରାଯାଇପାରିଛି।
ଏନେଇ ‘ପିପୁଲ ଫାଷ୍ଟ’ ପକ୍ଷରୁ ଶୁକ୍ରବାର ଆଭାସି ସମ୍ମିଳନୀ ଜରିଆରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। କାର୍ଯ୍ୟକ୍ରମରେ ଚଳିତ ବର୍ଷ ଖଣି ନିଗମ କିଭଳି ଅତ୍ୟାଧୁନିକ ଯନ୍ତ୍ରପାତି ବ୍ୟବହାର ସହ ମାନବସମ୍ବଳର ସୁବିନିଯୋଗ କରିପାରିଛି ଏବଂ କର୍ମକ୍ଷେତ୍ରରେ ସୁରକ୍ଷା ଓ ପରିବେଶ ଦିଗ ପ୍ରତି ଧ୍ୟାନ ଦେଇଛି ତାକୁ ନେଇ ପ୍ରଶଂସା କରାଯାଇଥିଲା। ନିକଟରେ ନିଗମର ଦୈତାରୀ ଏବଂ କୁର୍ମିତାର ଖଣି ଓଡ଼ିଶା ରାଜ୍ୟ ସୁରକ୍ଷା ସମ୍ମିଳନୀ-୨୦୨୧ରେ ‘କଳିଙ୍ଗ ସେଫ୍ଟି ଏକ୍ସଲେନ୍ସ ଆୱାର୍ଡ’ ଲାଭ କରିଛି। ଏହାବାଦ୍ କର୍ମକ୍ଷେତ୍ରରେ ସ୍ବତନ୍ତ୍ର ସୁରକ୍ଷାକୁ ଧ୍ୟାନ ଦେଉଥିବାରୁ ଦୈତାରୀ ଖଣି ମଧ୍ୟ ‘ଗୋଲଡେନ୍ ପିକକ୍ ଅକୁପେସନାଲ ହେଲ୍ଥ ଆଣ୍ଡ ସେଫଟି ଆୱାର୍ଡ-୨୦୨୧’ ହାସଲ କରିଛି। ଖଣି ନିଗମ ସବୁବେଳେ କର୍ମକ୍ଷେତ୍ରରେ ଶୂନ ବିପଦକୁ ଧ୍ୟାନରେ ରଖି କାର୍ଯ୍ୟ କରୁଛି। ଏହାକୁ ନେଇ ନିଗମ ପକ୍ଷରୁ ଚଳିତବର୍ଷର ବିଷୟବସ୍ତୁ ‘ସେଫ୍ଟି ଫାଷ୍ଟ-ଆଭଏଡ ଦ ୱର୍ଷ୍ଟ’ ନାରା ଦିଆଯାଇଛି। ଖଣି ନିଗମର ଜନକେନ୍ଦ୍ରୀକ କାର୍ଯ୍ୟକ୍ରମ ପାଇଁ ଗ୍ରୀନ୍ ଫାଉଣ୍ଡେସନ ପକ୍ଷରୁ ‘ସିଏସଆର ଇଣ୍ଡିଆ ଆୱାର୍ଡ-୨୦୨୧’ ଏବଂ ଆପେକ୍ସ ଇଣ୍ଡିଆ ପକ୍ଷରୁ ସିଏସଆର ଏକ୍ସଲେନ୍ସ ଆୱାର୍ଡ-୨୦୨୧’ ହକଦାର ହୋଇପାରିଛି। ଭାରତ ବର୍ଷରେ ଓଡ଼ିଶା ଖଣି ନିଗମ ହେଉଛି ସବୁଠାରୁ ଏକ ଅଗ୍ରଣୀ ରାଷ୍ଟ୍ରାୟତ୍ତ ଉଦ୍ୟୋଗ। ନିଗମ ସବୁବେଳେ ତା’ର ଉତ୍କର୍ଷତା କର୍ମକ୍ଷେତ୍ରରେ ଦେବା ସହିତ ଉଦାହରଣ ସୃଷ୍ଟି କରିଛି।
