ହାଇଦ୍ରାବାଦ୍: ତେଲେଙ୍ଗାନାର ଜଗିତିଆଲ୍ ଜିଲ୍ଲାରେ ସଡକ ପରିବହନ ନିଗମର ଏକ ଯାତ୍ରୀବାହୀ ଦୁର୍ଘଟଣାଗ୍ରସ୍ତ ହୋଇ ଘାଟିକୁ ଖସି ପଡିଛି। ଏନଡି ଟିଭି ରିପୋର୍ଟ ଅନୁଯାୟୀ ଏହି ଦୁର୍ଘଟଣାରେ ୬ଜଣ ଶିଶୁଙ୍କ ସମେତ ୪୦ ଜଣ ଯାତ୍ରୀ ପ୍ରାଣ ହରାଇଛନ୍ତି ଏବଂ ୨୦ରୁ ଅଧିକ ଯାତ୍ରୀ ଆହତ ହୋଇଛନ୍ତି । ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ମୃତ୍ୟୁ ସଂଖ୍ୟା ବଢିବାର ଆଶଙ୍କା କରାଯାଉଛି ।
ମିଳିଥିବା ସୂଚନା ଅନୁଯାୟୀ, ବସଟି କୋଣ୍ଡାଗାଟ୍ଟୁ ରୁ ଜଗିତିଆଲ୍ ଫେରୁଥିବା ବେଳେ ଶନିବାରପେଟ ଗାଁ ନିକଟରେ ଥିବା ଘାଟି ରାସ୍ତାରେ ଦୁର୍ଘଟଣାଗ୍ରସ୍ତ ହୋଇ ଘାଟି ତଳକୁ ଖସିପଡିଥିଲା । ବସଟି ୭୦ ଜଣ ଯାତ୍ରୀଙ୍କୁ ନେଇ ଯାଉଥିବା ବେଳେ ୧୧.୪୫ମିନିଟରୁ ଅପରାହ୍ନ ମଧ୍ୟରେ ଦୁର୍ଘଟଣା ଘଟିଥିବା ଜଣାପଡିଛି। ଆହତଙ୍କୁ ନିକଟସ୍ଥ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି।
ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଆଜି ମଙ୍ଗଳବାର ହୋଇଥିବାରୁ ବସରେ ଥିବା ଯାତ୍ରୀଙ୍କ ମଧ୍ୟରୁ ଅଧିକାଂଶ ଯାତ୍ରୀ ପର୍ବତ ଉପରେ ଆଞ୍ଜନେୟ ସ୍ବାମୀଙ୍କ ଦର୍ଶନ ପାଇଁ ଯାଇଥିଲେ । ଘାଟିରୁ ଫେରିବା ସମୟରେ ବସଟି ବ୍ରେକ୍ ଫେଲ ହୋଇ ଦୁର୍ଘଟଣା ଘଟିଛି ।
ରାଜ୍ୟ ମୁଖ୍ୟମନ୍ତ୍ରୀ କେ.ଚନ୍ଦ୍ରଶେଖର ରାବ ଦୁଃଖ ପ୍ରକାଶ କରିବା ସହ ଏହି ଦୁର୍ଘଟଣାରେ ପ୍ରାଣ ହାରିଥିବା ଯାତ୍ରୀଙ୍କୁ ୫ ଲକ୍ଷ ଟଙ୍କା ରାଶି ପ୍ରଦାନ କରାଯିବ ବୋଲି ଘୋଷଣା କରିଛନ୍ତି ।