ଆଠଗଡ଼: ଆଠଗଡ଼ ଅଞ୍ଚଳର ଜଣେ ବିଶିଷ୍ଠ ଶିକ୍ଷାବିତ୍ ତଥା ସୁନାମଧନ୍ୟ ପାଲାଗୁରୁ ଯୋରନ୍ଦା ଗ୍ରାମର ରମେଶ ଚନ୍ଦ୍ର ପଟ୍ଟନାୟକ (୮୭)ଙ୍କର ଶନିବାର ଅପରାହ୍ଣ ପ୍ରାୟ ୧ଟାରେ ପରଲୋକ ହୋଇଯାଇଛି। ବାର୍ଦ୍ଧକ୍ୟ ଜନିତ ରୋଗଶଯ୍ୟାରେ କିଛିଦିନ ପଡ଼ି ଚିକିତ୍ସିତ ହେଉଥିବା ବେଳେ ତାଙ୍କର ପରଲୋକ ହୋଇଥିଲା। ମୃତ୍ୟୁ ଶଯ୍ୟା ନିକଟରେ ପତ୍ନୀ, ୫ପୁଅ, ଏକମାତ୍ର ଝିଅ ଓ ଜ୍ୱାଇଁଙ୍କ ସମେତ ପରିବାର ସଦସ୍ୟ ଉପସ୍ଥିତ ଥିଲେ। ଜଣେ ଦକ୍ଷ ତଥା ଛାତ୍ରବତ୍ସଳ ଶିକ୍ଷକ ଭାବେ ଏବଂ ସୁନାମଧନ୍ୟ ପାଲା ଗାୟକ ରୂପେ ଆଠଗଡ଼ ଅଞ୍ଚଳରେ ସେ ବେଶ ଲୋକପ୍ରିୟ ଥିଲେ।
ତାଙ୍କ ପରଲୋକ ଖବର ପ୍ରଚାରିତ ହେବା ମାତ୍ରେ ଯୋରନ୍ଦା, ତରଡିଙ୍ଗ, ଗୋପିନାଥପୁର, କୁଲେଇଲୋ ସମେତ ଆଠଗଡ଼ ଅଞ୍ଚଳରେ ଶୋକର ଛାୟା ଖେଳିଯାଇଥିଲା। ଯୋରନ୍ଦା ସରପଞ୍ଚ ସୂର୍ଯ୍ୟକାନ୍ତ ସ୍ୱାଇଁ, ସମାଜସେବୀ ଉଦୟନାଥ ନାୟକ, ହାଡ଼ିବନ୍ଧୁ ସ୍ୱାଇଁ, ଶିକ୍ଷାବିତ୍ ସୁରେଶ ଚନ୍ଦ୍ର ପରିଡ଼ା, ଗନ୍ଧର୍ବସେନ ବେଉରା, ନିଖିଳ ପରିଡ଼ାଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଏବଂ ଅଞ୍ଚଳର ବହୁ ପାଲାଗାୟକ ଓ ପାଲା କଳାକାର ତାଙ୍କ ଯୋରନ୍ଦାସ୍ଥିତ ବାସଭବନରେ ପହଞ୍ଚି ଶେଷ ଦର୍ଶନ କରିବା ସହ ଶ୍ରଦ୍ଧାଞଳି ଅର୍ପଣ କରିଥିଲେ। ଗ୍ରାମ ଶ୍ମସାନରେ ଶେଷକୃତ୍ୟ ସମ୍ପନ୍ନ ହୋଇଥିବା ବେଳେ ବଡ଼ପୁଅ ତଥା ପୂର୍ବତନ ସମିତିସଭ୍ୟ ପ୍ରତାପ ରୁଦ୍ର ପଟ୍ଟନାୟକ ମୁଖାଗ୍ନି ଦେଇଥିଲେ।
