ସମ୍ବଲପୁର: ନୂଆଖାଇ ହେଉଛି ପଶ୍ଚିମ ଓଡିଶାର କୃଷିଭିତ୍ତିକ ଗଣପର୍ବ। ସୋମବାର ଅପରାହ୍ନ ୪ଟା ସମୟରେ ସମ୍ବଲପୁରର ଝାଡୁଆପଡାର ବ୍ରହ୍ମପୁରା ମନ୍ଦିରରେ ପଣ୍ଡିତ ସଭା ବସିବ। ପଣ୍ଡିତମାନେ ପାରମ୍ପରିକ ପୂଜାର୍ଚ୍ଚନା ପରେ ପାଞ୍ଜି ଦେଖି ନୂଆଖାଇ ପର୍ବର ଲଗ୍ନ ସ୍ଥିର କରିବେ।
ସବୁ ବର୍ଷ ଝାଡୁଆପଡାର ବ୍ରହ୍ମପୁରା ମନ୍ଦିରର ଟ୍ରଷ୍ଟ ବୋର୍ଡ ପକ୍ଷରୁ ଜନ୍ମାଷ୍ଟମୀ ପରଦିନ ଅର୍ଥାତ ନନ୍ଦୋତ୍ସବ ଦିନ ନୂଆଖାଇ ପର୍ବ ନିମନ୍ତେ ଲଗ୍ନ ସ୍ଥିର ହୋଇଥାଏ। ଲଗ୍ନ ଅନୁସାରେ ଭାଦ୍ରବ ମାସ ଶୁକ୍ଲ ପକ୍ଷ ପଞ୍ଚମୀ ତିଥିର ନିର୍ଦ୍ଧାରିତ ସମୟରେ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମାଆ ସମଲେଇଙ୍କ ନିକଟରେ ପ୍ରଥମେ ନବାନ୍ନ ଲାଗି ହୋଇଥାଏ। ଏହାପରେ ଅନ୍ୟ ଦେବାଦେବୀଙ୍କ ନିକଟରେ ନବାନ୍ନ ଲାଗି ହେବା ପରେ ପ୍ରତ୍ୟେକ ଘରେ ସମସ୍ତେ ନୂଆ ଖାଇଥାନ୍ତି।
