ଆଫଗାନ ସରକାରଙ୍କୁ ଭାରତ ଦାନ କରିଥିବା ହେଲିକପ୍ଟରକୁ ତାଲିବାନ ନେଇଗଲା

କାବୁଲ: ଭାରତ ସରକାରଙ୍କ ପକ୍ଷରୁ ଆଫଗାନିସ୍ତାନ ସରକାରଙ୍କୁ ଦାନ କରାଯାଇଥିବା ଏକ ଏମଆଇ-୩୫ ହେଲିକପ୍ଟର ଏବେ ତାଲିବାନ ଦଖଲକୁ ଚାଲିଯାଇଥିବା ଜଣାଯାଇଛି। କୁନ୍ଦୁଜ ବିମାନ ବନ୍ଦରରେ ଉକ୍ତ ହେଲିକପ୍ଟର ଛିଡା ହୋଇଥିବାବେଳେ ତାହା ନିକଟରେ ଜଣେ ତାଲିବାନ ଆତଙ୍କି ମୋଟରସାଇକେଲରେ ଛିଡା ହୋଇଥିବା ସାମାଜିକ ଗଣମାଧ୍ୟମରେ ପ୍ରସାରିତ ଭିଡିଓ ଚିତ୍ରରୁ ଦେଖିବାକୁ ମିଳିଛି। ଉକ୍ତ ବ୍ୟକ୍ତି ଜଣକ ତାଲିବାନ ଆତଙ୍କି ଏବଂ ସମ୍ଭବତଃ ହେଲିକପ୍ଟରକୁ ତାଲିବାନ କବଜା କରିନେଇଥିବା ମନେ କରାଯାଉଛି। କାରଣ ତାଲିବାନ ଆତଙ୍କିମାନେ ଗତ ସପ୍ତାହରେ କୁନ୍ଦୁଜ ସହର ନିଜ ଦଖଲକୁ ନେଇସାରିଛନ୍ତି। ଭିଡିଓରୁ ଆଉ ମଧ୍ୟ ଦେଖିବାକୁ ମିଳିଛି ଯେ ଉକ୍ତ ହେଲିକପ୍ଟରରେ ରୋଟରଗୁଡିକ ନଥିବାରୁ ତାହା ହୁଏତ ଅକାମି ଅବସ୍ଥାରେ ସେହିଠାରେ ରଖାଯାଇଛି। ହେଲିକପ୍ଟରରେ ଲେଖାଯାଇଥିବା ସଂଖ୍ୟାରୁ ତାହା ଭାରତ ଦ୍ୱାରା ଦାନ କରାଯାଇଥିବା ହେଲିକପ୍ଟର ବୋଲି ଜଣାଯାଇଛି। ସୂଚନାଯୋଗ୍ୟ ଯେ ଏହାକୁ ମିଶାଇ ଭାରତ ସରକାର ଆଫଗାନିସ୍ତାନ ସରକାରଙ୍କୁ ଚାରିଟି ହେଲିକପ୍ଟର ଦାନ କରିଥିଲେ।