କାବୁଲ: ତାଲିବାନକୁ ପାକିସ୍ତାନ ସରକାର ପୂର୍ଣ୍ଣ ସମର୍ଥନ ଯୋଗାଇ ଦେଉଛନ୍ତି। ତାଲିବାନ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ ଆଫଗାନିସ୍ତାନ ସରକାର ଏବଂ ଦେଶର ସଶସ୍ତ୍ର ବାହିନୀକୁ ପାକିସ୍ତାନ କଡା ଚେତାବନୀ ମଧ୍ୟ ଦେଇଛି। ଏଭଳି ଅଭିଯୋଗ ଆଣିଛନ୍ତି ଆଫଗାନିସ୍ତାନର ଉପ ରାଷ୍ଟ୍ରପତି ଅମରୁଲ୍ଲା ସାଲେହ। ସେ କହିଛନ୍ତି ଯେ ସ୍ପିନ ବୋଲଡାକ୍ ଅଞ୍ଚଳରେ ତାଲିବାନ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ ପାକିସ୍ତାନ ସତର୍କ କରାଇ ଦେଇଛି। ପାକିସ୍ତାନର ବାୟୁସେନା ଆଫଗାନ ସରକାରଙ୍କୁ ଏହିଭଳି ଚେତାବନୀ ଦେଇଥିବା ସେ କହିଛନ୍ତି। ଯଦି ଆଫଗାନିସ୍ତାନ ସେଭଳି କୌଣସି ପଦକ୍ଷେପ ନିଏ ତେବେ ପାକିସ୍ତାନ ବିହିତ ପଦକ୍ଷେପ ଗ୍ରହଣ କରିବ ବୋଲି କୁହାଯାଇଛି। ସଂପ୍ରତି ପାକିସ୍ତାନର ବାୟୁସେନା ଏବଂ ଆଇଏସଆଇ ତାଲିବାନକୁ ପୂର୍ଣ୍ଣ ସମର୍ଥନ ଓ ସହାୟତା ଦେଉଛନ୍ତି।
ଇତିମଧ୍ୟରେ ତାଲିବାନ ଏବଂ ଆଫଗାନ ନେତୃବୃନ୍ଦ ଦେଶର ପଶ୍ଚିମାଞ୍ଚଳ ପ୍ରଦେଶରେ ଯୁଦ୍ଧବିରତି ନିମନ୍ତେ ରାଜି ହୋଇଥିବା ଖବର ହସ୍ତଗତ ହୋଇଛି। ଆଫଗାନି ସୈନ୍ୟ ଏବଂ ତାଲିବାନ ଲଢୁଆଙ୍କ ମଧ୍ୟରେ ଏହି ରାଜିନାମା ହୋଇଛି। ଆଦିବାସୀ ନେତାଙ୍କ ମଧ୍ୟସ୍ଥତାରେ ଏହି ରାଜିନାମା ହୋଇଥିବା ବାଦଘିସ ଗଭର୍ଣ୍ଣର ହେସାମୁଦ୍ଦିନ ଶାମସ କହିଛନ୍ତି। ତାଲିବାନ ଆଫଗାନିସ୍ତାନର ୮୫% ଅଞ୍ଚଳ ନିଜ ଦଖଲରେ ରଖିଥିବା ଦାବି କରୁଥିବାବେଳେ ଏହା ଅଧିକରୁ ଅଧିକ ଅଞ୍ଚଳ ଦଖଲ କରିବା ପ୍ରୟାସରେ ରହିଛି।
