ହରଭଙ୍ଗାରେ ବୃହତ ପାଇପ୍ ଜଳ ଯୋଗାଣ ପ୍ରକଳ୍ପ ପାଇଁ ୭୩୦କୋଟି ଟଙ୍କାର ଟେଣ୍ଡର ଚୂଡାନ୍ତ

ହରଭଙ୍ଗା: ଦୀର୍ଘଦିନର ଦାବୀ ପରେ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକବାସୀଙ୍କ ପିଇବା ପାଣି ସମସ୍ୟା ଦୂର ହେବାର ଆଶା ସଂଚାର ହୋଇଛି। ହରଭଙ୍ଗା ବ୍ଲକରେ ବୃହତ ପାଇପ୍ ଜଳ ଯୋଗାଣ ପ୍ରକଳ୍ପ ନିର୍ମାଣ ପାଇଁ ୭୩୦ କୋଟି ଟଙ୍କା ମଞୁର ହୋଇଛି। ସେଥିରୁ ୨୭୦ କୋଟି ଟଙ୍କା ହରଭଙ୍ଗା ବ୍ଲକ ପାଇଁ ବ୍ୟୟବରାଦ ହେବ। ଆଉ ବାକି ୪୬୦ କୋଟି ଟଙ୍କା କନ୍ଧମାଳ ଜିଲ୍ଲାର ୪ଟି ବ୍ଲକ ପାଇଁ ବ୍ୟୟବରାଦ କରାଯିବା ପାଇଁ ସ୍ଥିର ହୋଇଛି। ଏହାର ଟେଣ୍ଡର ପ୍ରକିୟା ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ଫଳରେ ଆସନ୍ତା ସେପ୍ଟମ୍ବର କିମ୍ବା ଅକ୍ଟୋବର ମାସରେ ପ୍ରକଳ୍ପ ନିର୍ମାଣ କାର୍ଯ୍ୟ ଆରମ୍ଭ ହେବ ବୋଲି ବୌଦ୍ଧ ଜଳ ଓ ପରିମଳ କାର୍ଯ୍ୟନିର୍ବାହୀଯନ୍ତ୍ରୀ ଭଞକିଶୋର ମନୋହରୀ ସୂଚନା ଦେଇଛନ୍ତି। ମହାନଦୀର ପାଣିଘରାଠାରେ ଏହି ପ୍ରକଳ୍ପ ନିର୍ମାଣ ହେବ ବୋଲି ସୂଚନା ମିଳିଛି। ପ୍ରକଳ୍ପ କାର୍ଯ୍ୟକାରୀ ହେଲେ ଦୈନିକ ଗୋଟିଏ ପରିବାରକୁ ୭୦ଲିଟର ପିଈବା ପାଣି ମିଳିବ। ଏଥିପାଇଁ ଦୁଇରୁ ତିନୋଟି ବଡ ବଡ ଓଭରହ୍ୟାଡ ଟ୍ୟାଙ୍କ ସହିତ ଟ୍ରିଟମେଂଟ ପ୍ଲାଂଟ ମଧ୍ୟ ନିର୍ମାଣ କରାଯିବ। ପ୍ରକଳ୍ପ କାର୍ଯ୍ୟକାରୀ ହେଲେ ହରଭଙ୍ଗା ବ୍ଲକର ୨୨ପଂଚାୟତର ୩୬୨ଟି ରାଜସ୍ୱ ଗାଁ ଲୋକ ଉପକୃତ ହେବେ। ଏହା ସହିତ କନ୍ଧମାଳ ଜିଲ୍ଲାର ଫୁଲବାଣୀ, ଫିରିଙ୍ଗିଆ, ଖଜୁରୀପଡା ଏବଂ ଚକାପାଦ ଭଳି ୪ଟି ବ୍ଲକର ହଜାର ହଜାର ଜନସାଧାରଣଙ୍କୁ ମହାନଦୀର ମଧୁର ଜଳ ପିଈବା ପାଇଁ ସୁବିଧା ମିଳିପାରିବା ।

ସୂଚନା ଥାଉକି, ମହାନଦୀକୂଳରେ ଅବସ୍ଥିତ ହରଭଙ୍ଗା ବ୍ଲକରେ ବର୍ଷତମାମ ପିଇବା ପାଣି ସମସ୍ୟା ଦେଖା ଦେଇଥାଏ। ଏହାକୁ ଦୃଷ୍ଟିରେ ରଖି ଗତ ଅଗଷ୍ଟ ୨୦୧୯ରେ ଏକ ବୃହତ ପାଇପ୍ ଜଳ ଯୋଗାଣ ପ୍ରକଳ୍ପ ନିର୍ମାଣ ପାଇଁ ସର୍ଭେ କାର୍ଯ୍ୟ ଆରମ୍ଭ ହୋଇଥିଲା। ଦୀର୍ଘ ତିନିମାସ ଧରି କଲିକତାର ମାରର୍ସ ନାମକ ଏକ ସଂସ୍ଥା ଦ୍ୱାରା ସବିଶେଷ ପ୍ରକଳ୍ପ ରିପୋର୍ଟ ପାଇଁ ପ୍ରାଥମିକ ସର୍ଭେ କାର୍ଯ୍ୟ କରାଯାଇଥିଲା । ଏଥିପାଇଁ ଦୁଇଟି ଟିମରେ ଉକ୍ତ ସଂସ୍ଥାର ୬ଜଣିଆ ସର୍ଭେ କର୍ମଚାରୀ ନିୟୋଜିତ ହୋଇଥିଲେ । ମାତ୍ର ସର୍ଭେ କାର୍ଯ୍ୟର ଦେଢବର୍ଷ ପରେ ବି ପ୍ରକଳ୍ପ ନିର୍ମାଣ ପାଇଁ ଟେଣ୍ଡରରେ ବିଳମ୍ବ ଯୋଗୁଁ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ମାତ୍ର ଏହାର ନିର୍ମାଣ କାର୍ଯ୍ୟ ପାଇଁ ଟେଣ୍ଡର ପ୍ରକିୟା ଚୂଡାନ୍ତରେ ପହଞ୍ଚିବା ପରେ ବ୍ଲକବାସୀଙ୍କ ମଧ୍ୟରେ ଉତ୍କଣ୍ଠା ପ୍ରକାଶ ପାଇଛି। ସୂଚନା ଥାଉକି ବୃହତ ପାଈପ ଜଳ ଯୋଗାଣ ପ୍ରକଳ୍ପ ସମ୍ପର୍କରେ ସମାଜରେ ଲଗାତାର ଖବର ପ୍ରକାଶ ପାଇଥିଲା।