କରାଚୀ: ପାକିସ୍ତାନ ଜନସାଧାରଣ କୋଭିଡ କଟକଣା ପାଳନ କରୁନଥିବାରୁ ଦେଶରେ କୋଭିଡର ସାନି ଲହର ବ୍ୟାପିବା ଆଶଙ୍କା ଦେଖାଦେଇଛି। ଦେଶର ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କର ସ୍ୱାସ୍ଥ୍ୟ ପ୍ରସଙ୍ଗରେ ଥିବା ସ୍ୱତନ୍ତ୍ର ସହାୟକ ଡା.ଫଇସଲ ସୁଲତାନ୍ କହିଛନ୍ତି ଯେ କୋଭିଡ କଟକଣା ଉଲ୍ଲଂଘନ କାରଣରୁ ପାକିସ୍ତାନରେ କୋଭିଡ ସଂକ୍ରମଣର ଆଉ ଏକ ଲହର ସୃଷ୍ଟିହେବା ଆଶଙ୍କା ବଢିବାରେ ଲାଗିଛି। ଏକ ବାର୍ତ୍ତାରେ ଡା.ଫଇସଲ କହିଛନ୍ତି, କିଛି ସପ୍ତାହ ତଳେ ୭୫ରୁ ୮୦ ପ୍ରତିଶତ ଲୋକ କୋଭିଡ କଟକଣା ମାନୁଥିବାବେଳେ ସଂପ୍ରତି ତାହା ହାରାହାରି ୪୬%କୁ ଖସିଆସିଛି। ସରକାର ମଧ୍ୟ ଏହା ଉପରେ ନଜର ରଖିଛନ୍ତି। କିନ୍ତୁ ଦୁର୍ଭାଗ୍ୟକୁ ଜନସାଧାରଣଙ୍କ ସହଯୋଗ ବିନା ଏହା ପାଳନ କରିବା କଷ୍ଟକର ହୋଇପଡିଛି। ଏ ସମ୍ପର୍କିତ ପରିସଂଖ୍ୟାନ ଉପସ୍ଥାପନ କରି ସେ କହିଛନ୍ତି, ଦେଶରେ ୪୦% ବ୍ୟବସାୟ ପ୍ରତିଷ୍ଠାନ ଏବଂ ପରିବହନ କ୍ଷେତ୍ର କୋଭିଡ କଟକଣା ପାଳନ କରୁଥିବାବେଳେ ୬୦% ତାହା ପାଳନ କରୁନାହାନ୍ତି। ଶିଳ୍ପ କ୍ଷେତ୍ରରେ ମାତ୍ର ୩୮% କୋଭିଡ କଟକଣା ପାଳନ କରୁଥିବାବେଳେ ମସଜିଦଗୁଡିକରେ ୪୧% ଏବଂ ସର୍ବସାଧାରଣ ସ୍ଥଳଗୁଡିକରେ ଏହା ଅତିବେଶିରେ ୪୦ରୁ ୪୨% ପାଳନ କରାଯାଉଛି। ଡାକ୍ତରଖାନାଗୁଡିକରେ ୭୦% କୋଭିଡ କଟକଣା ପାଳନ କରାଯାଉଥିଲେ ମଧ୍ୟ ସେଠାରେ ଏହା ୧୦୦%ରୁ କମ୍ ହେବା ଉଚିତ ନୁହେଁ ବୋଲି ଡା.ଫଇସଲ ମତ ଦେଇଛନ୍ତି। ସେ କହିଛନ୍ତି ଯେ ଦେଶରେ ଟିକାକରଣ ଚାଲିଛି ଏବଂ ଏପର୍ଯ୍ୟନ୍ତ ୧୧.୮ ନିୟୁତ ପାନ କୋଭିଡ ଟିକା ପହଞ୍ଚିଥିବାବେଳେ ସେଥିମଧ୍ୟରୁ ୭୬% ପାକିସ୍ତାନ ସରକାର ଖରିଦ କରିଛନ୍ତି।
Popular Categories
Previous article
Next article