ମୁମ୍ବଇ: ଇଂଲଣ୍ଡ ଗସ୍ତରେ ଯାଉଥିବା ଭାରତୀୟ ମହିଳା କ୍ରିକେଟ୍ ଦଳର ଖେଳାଳି ଓ ସପୋର୍ଟ ଷ୍ଟାଫ୍ କରୋନା ଟିକାର ପ୍ରଥମ ପାନ ନେଇଛନ୍ତି। ଜୁନ୍ ୨ରେ ଭାରତୀୟ ପୁରୁଷ କ୍ରିକେଟ୍ ଦଳ ସହ ମିଶି ଗୋଟିଏ ସ୍ୱତନ୍ତ୍ର (ଚାର୍ଟର) ବିମାନରେ ଭାରତୀୟ ମହିଳା କ୍ରିକେଟ୍ ଦଳ ଇଂଲଣ୍ଡ ଗସ୍ତରେ ଯିବ। ଏହି ଗସ୍ତରେ ଘରୋଇ ଇଂଲଣ୍ଡ ଦଳ ବିରୋଧରେ ମିତାଲି ରାଜ୍ଙ୍କ ନେତୃତ୍ୱାଧୀନ ଦଳ ଜୁନ୍ ୧୬ରୁ ବ୍ରିଷ୍ଟଲରେ ଏକ ଗୋଲାପି ବଲ୍ ଟେଷ୍ଟମ୍ୟାଚ୍ ଖେଳିବା ପରେ ୨ଟି ଟ୍ୱେଣ୍ଟି୨୦ ଏବଂ ୩ଟି ମ୍ୟାଚ୍ର ଦିନିକିଆ ସିରିଜ୍ ଖେଳିବ। ବିସିସିଆଇ ସୂତ୍ରରୁ ପ୍ରକାଶ ଯେ ଭାରତୀୟ ମହିଳା କ୍ରିକେଟ୍ ଦଳର କିଛି ଖେଳାଳି ଓ ସପୋର୍ଟ ଷ୍ଟାଫ୍ ସେମାନଙ୍କ ସହରରେ କରୋନା ଟିକା ନେଇଥିଲେ। ତେବେ ଇଂଲଣ୍ଡ ଯିବା ପୂର୍ବରୁ ସେମାନେ ସଂଗରୋଧରେ ଥିବା ବେଳେ ଯେଉଁମାନେ ଆଦୌ ଟିକା ନେଇନାହାନ୍ତି; ସେମାନଙ୍କୁ କୋଭିସିଲ୍ଡର ପ୍ରଥମ ପାନ ଦିଆଯାଇଛି।
ଇଂଲଣ୍ଡରେ ଥିବା ବେଳେ ସେମାନଙ୍କୁ ୨ୟ ପାନ ଟିକା ନେବାର ବ୍ୟବସ୍ଥା କରାଯାଇଛି। ଏଥିପାଇଁ ଇଂଲଣ୍ଡ ସରକାରଙ୍କ ସ୍ୱାସ୍ଥ୍ୟ ବିଭାଗ ସହ ବିସିସିଆଇ କଥାବାର୍ତ୍ତା କରିଛି। ସେହିପରି ଭାରତୀୟ ପୁରୁଷ କ୍ରିକେଟ୍ ଦଳର ଅଧିକାଂଶ ସଦସ୍ୟ ମାନଙ୍କ ସହରରେ କୋଭିଡ୍-୧୯ ଟିକାର ପ୍ରଥମ ପାନ ନେଇ ସାରିଛନ୍ତି। ଅନ୍ୟମାନେ ମୁମ୍ବଇରେ ସଂଗରୋଧରେ ଥିବା ବେଳେ ୨ୟ ପାନ ନେଇଛନ୍ତି। ଇଂଲଣ୍ଡରେ ଥିବା ବେଳେ ସେମାନେ ୨ୟ ପାନ ଟିକା ନେବେ।
