ରାମନାଗୁଡା: ଆନ୍ଧ୍ର ଷ୍ଟ୍ରେନକୁ ନେଇ ରାୟଗଡ଼ା ଜିଲ୍ଲା ରାମନାଗୁଡା ବ୍ଲକପ୍ରଶାସନର ଚିନ୍ତା ବଢିଯାଇଛି। ଆନ୍ଧ୍ର-ଓଡ଼ିଶାର ସମସ୍ତ ସୀମାରେ ଚେକପୋଷ୍ଟ କରାଯିବା ସହ ବିଭିନ୍ନ ଗଳାବାଟକୁ ରୋକିବା ଲାଗି ସ୍ଥାନୀୟ ପୁଲିସ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି।ସ୍ଥାନୀୟ ସୁଲୁଡି ଛକରେ ଚେକପୋଷ୍ଟ ନିର୍ମାଣ କରାଯାଇ ଯାଞ୍ଚ କାର୍ୟ୍ୟ କଡ଼ାକଡ଼ି କରାଯାଇଛି। ଆନ୍ଧ୍ର ଓ ଓଡ଼ିଶାର ଅମାନିଆଙ୍କ ଉପରେ ସ୍ବତନ୍ତ୍ର ନଜର ରଖାଯାଇଛି। ତେବେ ରାମନାଗୁଡା ବ୍ଲକରେ ୭୦ ପଜିଟିଭ୍ ଚିହ୍ନଟ ହୋଇଥିବାବେଳେ ୨୦ଜଣ ସୁସ୍ଥ ହୋଇଛନ୍ତି।ଏଥିମଧ୍ୟରୁ ୫୦ ସକ୍ରିୟ ମାମଲା ରହିଥିବା ସୂଚନା ମିଳିଛି।
ଆଜି ରାମନାଗୁଡାରୁ ୯ଜଣ ପଜିଟିଭ୍ ଚିହ୍ନଟ ହୋଇଥିବା ଜଣାପଡିଛି। ସଂକ୍ରମଣକୁ ଦୃଷ୍ଟିରେ ରଖି ସୀମାନ୍ତରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ସୀମାନ୍ତରେ ଲାଗି ରହିଥିବା ବିଭିନ୍ନ ଗଳାବାଟକୁ ବନ୍ଦ କରାଯିବା ସହ ସୀମାନ୍ତ ମଧ୍ୟ ଦେଇ ପ୍ରବେଶ କରୁଥିବା ଲୋକଙ୍କୁ ସଙ୍ଗରୋଧରେ ରଖାଯାଉଛି। ଟେଷ୍ଟିଂକୁ ଜୋରଦାର କରାଯିବା ସହ ଲକ୍ଷଣ ଦେଖାଗଲେ ୧୪ଦିନ ସଙ୍ଗରୋଧରେ ରଖାଯାଉଛି। ସ୍ୱାସ୍ଥ୍ୟାବସ୍ଥାରେ ଅବନତି ଦେଖାଗଲେ ଗୁଣୁପୁର କିମ୍ବା ବିଷମକଟକ କୋଭିଡ଼ କେୟାର ସେଣ୍ଟରକୁ ସ୍ଥାନାନ୍ତର କରାଯାଉଥିବା ଜଣାପଡ଼ିଛି। ସ୍ଥାନୀୟ ପୁଲିସ ପକ୍ଷରୁ ସଂକ୍ରମଣକୁ ରୋକିବା ଲାଗି ସୀମାନ୍ତରେ ସୁରକ୍ଷା କର୍ମୀ ନିୟୋଜିତ ହେବା ସହ ବିଭିନ୍ନ ଛକ ସ୍ଥାନରେ ପୁଲିସ ପକ୍ଷରୁ ଚେକିଂକୁ କଡ଼ାକଡ଼ି କରାଯାଇଛି।
