ନୂଆଦିଲ୍ଲୀ: କରୋନା ପାଇଁ ବିଶ୍ୱ ଅର୍ଥନୀତି ବର୍ତ୍ତମାନ ସମୟରେ ସଙ୍କଟ ଦେଇ ଗତି କରୁଛି ଏବଂ କୋଟି କୋଟି ଲୋକଙ୍କ ଚାକିରୀ ବିପଦରେ ରହିଛି। ଏଭଳି ପରିସ୍ଥିତିରେ ଏକ କମ୍ପାନୀ କୁକୁରଙ୍କ ପାଇଁ ଚାକିରୀ ସୁଯୋଗ ଆଣିଛି, ଯାହାର ଦରମା ଶୁଣି ଆପଣ ଚକିତ ହୋଇଯିବେ। କୁକୁରଙ୍କୁ ଚାକିରୀରେ ରଖିବା ପରେ କମ୍ପାନୀ ତାଙ୍କୁ ପ୍ରାୟ ୨୦ ହଜାର ଡଲାର ଦେବ। ଭାରତୀୟ ମୁଦ୍ରାରେ ଯାହାର ମୂଲ୍ୟ ପ୍ରାୟ ୧୫ ଲକ୍ଷ ଟଙ୍କା।
ଏହା ଏକ ଆମେରିକୀୟ ବିୟର କମ୍ପାନୀ। ଏହାର ନାମ ବୁଶ୍ ବିୟର। କମ୍ପାନୀକୁ ଏପରି ଏକ କୁକୁରର ଆବଶ୍ୟକତା ଅଛି, ଯିଏ ସ୍ୱାଦ ଚାଖିବାରେ ଏକ୍ଦମ୍ ପାରଙ୍ଗମ ଥିବ। ଏଥିପାଇଁ କମ୍ପାନୀ କୁକୁରଙ୍କୁ ନିଯୁକ୍ତି ଦେବା ପାଇଁ ପଦବୀ ସୃଷ୍ଟି କରିଛି। କମ୍ପାନୀର କହିବାନୁସାରେ, ଆମେ ଏକ ଚିଫ୍ ଟେଷ୍ଟିଂ ଅଫିସର୍ ଖୋଜୁଛୁ, ଯିଏ ବୁଶ୍ର ସର୍ବୋତ୍ତମ ସ୍ୱାଦ, ନୂଆ ସ୍ୱାଦ ଚାଖିବାରେ ପାରଙ୍ଗମ ଥିବ ଏବଂ ଫ୍ଲେଭର୍ ଉପରେ ଅନୁସନ୍ଧାନ କରିପାରିବ। ଏହାଦ୍ୱାରା କମ୍ପାନୀକୁ ସୁସ୍ୱାଦୁ ପାନୀୟ ପ୍ରସ୍ତୁତ କରିବାରେ ସାହାଯ୍ୟ ମିଳିବ। କମ୍ପାନୀ ନିଜ ଟ୍ୱିଟର ପେଜ୍ରେ ଏକ ଭିଡିଓ ପୋଷ୍ଟ କରି ଏହି ପଦବୀ ସମ୍ବନ୍ଧୀୟ ସୂଚନା ଦେଇଛି। ଭିଡିଓ ପୋଷ୍ଟ କରି କମ୍ପାନୀ ପକ୍ଷରୁ କୁହାଯାଇଛି ଯେ, ଏହି ପଦବୀରେ କେବଳ କୁକୁରଙ୍କୁ ହିଁ ନିଯୁକ୍ତି ମିଳିବ।
YOUR DOG could be hired as our Dog Brew Chief Tasting Officer w/ a $20K SALARY.
As our pawfessional taste-taster, they'll be the face of Busch Dog Brew.
Reply w/ your pup's pic & their qualifications w/ #BuschCTOcontest for their chance to get the job. pic.twitter.com/a9PGykWZGj
— Busch Beer (@BuschBeer) April 13, 2021
କମ୍ପାନୀ ନିଜ ପ୍ରେସ୍ ରିଲିଜ୍ ଜରିଆରେ ଏହା ମଧ୍ୟ କହିଛି ଯେ, କୁକୁରଙ୍କ ଉପରେ ବହୁତ ଦାୟିତ୍ୱ ରହିବ। ଚିଫ୍ ଟେଷ୍ଟିଂ ଅଫିସର ଭାବେ ତାଙ୍କୁ କ୍ୱାଲିଟି କଣ୍ଟ୍ରୋଲ ଉପରେ ଧ୍ୟାନ ଦେବାକୁ ପଡ଼ିବ। ଏହାବ୍ୟତୀତ ସେ ଉତ୍ପାଦର ବ୍ରାଣ୍ଡ ଆମ୍ବାସାଡ଼ର ମଧ୍ୟ ହେବେ। ଆବେଦନ କରିବାର ନିୟମ ଅତି ସରଳ। #BuschCTOcontest ଜରିଆରେ ଏଥିପାଇଁ ଆବେଦନ କରିବାକୁ ପଡ଼ିବ। ଏହାପରେ ମାଲିକଙ୍କୁ କହିବାକୁ ପଡ଼ିବ ଯେ, ତାଙ୍କ କୁକୁର ଏହି ପଦବୀ ପାଇଁ କାହିଁକି ଉପଯୁକ୍ତ। ଏହାକୁ ଆଧାର କରି କୁକୁରଙ୍କୁ ଚାକିରୀ ପାଇଁ ଚୟନ କରାଯିବ। ଆବେଦନ ପାଇଁ ଶେଷ ତାରିଖ ହେଉଛି ଏପ୍ରଲ୍ ୨୮ ତାରିଖ।
କମ୍ପାନୀ ପକ୍ଷରୁ ଏନେଇ ବିଜ୍ଞାପନ ଶେୟାର କରାଯିବା ପରେ ସାମାଜିକ ଗଣମାଧ୍ୟମରେ ଏହା ଖୁବ୍ ଭାଇରାଲ୍ ହୋଇଛି। ଭିଡିଓ ଦେଖିବା ପରେ କିଛି ଲୋକ ମଜାଳିଆ ପ୍ରତିକ୍ରିୟା ଦେଉଛନ୍ତି ତ ଆଉ କିଛି ଲୋକ ନିଜ କୁକୁରକୁ ଏହି ଚାକିରୀରେ ନିୟୋଜିତ କରାଇବାକୁ ଆଶା କରିଛନ୍ତି।
