ଭୁବନେଶ୍ୱର: ଆସନ୍ତା ୧୧ରୁ ଦେଶତମାମ ଟିକା ଉତ୍ସବ ପାଳନ ହେବ; ହେଲେ ରାଜ୍ୟରେ ଟିକାର ଅଭାବ ଏପର୍ୟ୍ୟନ୍ତ ମେଣ୍ଟିଲା ନାହିଁ। ରାଜ୍ୟ ସରକାରଙ୍କ ପକ୍ଷରୁ ଦୈନିକ ଅଢ଼େଇ ଲକ୍ଷରୁ ୩ଲକ୍ଷ ପର୍ୟ୍ୟନ୍ତ ଟିକାକରଣ ପାଇଁ ପ୍ରସ୍ତୁତି ଶେଷ ହୋଇଥିଲେ ହେଁ ଟିକା ଅଭାବରୁ ଅଭିଯାନ ଆଗେଇ ପାରୁନାହିଁ । ଏନେଇ ଦିନକ ତଳେ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନଙ୍କୁ ପତ୍ର ଲେଖିଥିବା ବେଳେ ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଅନୁରୋଧ କରିଥିଲେ। ଏହାପୂର୍ବରୁ ସ୍ବାସ୍ଥ୍ୟବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଦୁଇଥର କେନ୍ଦ୍ରକୁ ପତ୍ର ଲେଖିଥିବା ବେଳେ ଶୁକ୍ରବାର ପୁନର୍ବାର କେନ୍ଦ୍ର ଅତିରିକ୍ତ ସ୍ବାସ୍ଥ୍ୟସଚିବଙ୍କୁ ପତ୍ର ଲେଖି ତୁରନ୍ତ ୨୫ଲକ୍ଷ ଟିକା ଯୋଗାଇ ଦେବାକୁ ଅନୁରୋଧ କରିଛନ୍ତି।
ଶ୍ରୀ ମହାପାତ୍ର ପତ୍ରରେ ଦର୍ଶାଇଛନ୍ତି ଯେ ରାଜ୍ୟରେ ଅଦ୍ୟାବଧି ୩୯.୮୪ ଲକ୍ଷ ଟିକାକରଣ ହୋଇ ସାରିଲାଣି। ଏହାବାଦ୍ ୪୫ରୁ ୫୯ବର୍ଷ ବୟସ୍କଙ୍କ ମଧ୍ୟରେ ଥିବା ବିଭିନ୍ନ ବର୍ଗର ଲୋକଙ୍କୁ ୧୫ଲକ୍ଷ ୫୫ହଜାର ୪୨୨ ଟିକା ଦିଆଯାଇ ସାରିଲାଣି। ଜାତୀୟସ୍ତରୀୟ ହାର ଅପେକ୍ଷା ଓଡ଼ିଶାର ଟିକାକରଣ ହାର ଅଧିକ ରହିଛି। ମାତ୍ର ଟିକା ଅଭାବରୁ କାର୍ୟ୍ୟକ୍ରମକୁ ତ୍ବରାନ୍ବିତ କରାଯାଇପାରୁ ନାହିଁ। ବିଭାଗ ଏବେ ଦୈନିକ ୩ଲକ୍ଷ ଟିକା ଦେବାକୁ ସଜାଗ ରହିଛି। ଏହି ପରିପ୍ରେକ୍ଷୀରେ କେନ୍ଦ୍ର ପକ୍ଷରୁ କମ୍ ଟିକା ଆସିବା ଦୁର୍ଭାଗ୍ୟଜନକ ବୋଲି ସେ ଦର୍ଶାଇଛନ୍ତି। କେତେକ ଜିଲାରେ ଗଚ୍ଛିତ ଟିକା ଶେଷ ପର୍ୟ୍ୟାୟରେ ପହଞ୍ଚି ସାରିଲାଣି। ଏଥିପାଇଁ ଦୁଇତୃତୀୟାଂଶ ଟିକା କେନ୍ଦ୍ର ବନ୍ଦ ହୋଇସାରିଲାଣି।
