ମିରଟ୍: ଉତ୍ତରପ୍ରଦେଶ ସାମଲି ଜିଲାର ସରକାରୀ ହସ୍ପିଟାଲରେ ତିନିଜଣ ମହିଳାଙ୍କୁ କରୋନା ଟିକା ବଦଳରେ କୁକୁର କାମୁଡା ପ୍ରତିଷେଧକ ପାଇଁ ଉଦ୍ଦିଷ୍ଟ ଜଳାତଙ୍କ ଇଞ୍ଜେକସନ ଦିଆଯାଇଛି। ଏ ସମ୍ପର୍କରେ ଅଭିଯୋଗ ହେବା ପରେ ଜିଲାପାଳ ଏହାର ତଦନ୍ତ ନିର୍ଦେଶ ଦେଇଛନ୍ତି। ଅଭିଯୋଗ ଅନୁଯାୟୀ ୬୦ରୁ ୭୨ ବର୍ଷର ତିନି ମହିଳା କରୋନା ଟିକା ନେବା ଲାଗି ହସ୍ପିଟାଲକୁ ଯାଇଥିଲେ। ମହିଳାମାନେ କରୋନା ଟିକା ପାଇଁ ଆଉଟ୍ ଡୋର୍ରେ ଟିକଟ କରିଥିଲେ। ତେବେ ସେମାନେ ଜଳାତଙ୍କ ଇଞ୍ଜେକସନ୍ ପାଇଁ ଉଦ୍ଦିଷ୍ଟ ଲୋକଙ୍କ ଧାଡିରେ ଠିଆ ହୋଇଥିଲେ।
ସୋମବାର ଓ ଗୁରୁବାର ଡାକ୍ତରଖାନାରେ ଜଳାତଙ୍କ ଇଞ୍ଜେକସନ୍ ଦିଆଯାଇଥାଏ। ଗୋଟିଏ ସ୍ଥାନରେ କରୋନା ଟିକା ଦିଆଯାଉଥିବା ବେଳେ ଅନ୍ୟ ଏକ ସ୍ଥାନରେ ଜଳାତଙ୍କ ଇଞ୍ଜେକସନ୍ ଦିଆଯାଉଥିଲା। ମହିଳାମାନେ ଜଳାତଙ୍କ ଇଞ୍ଜେକସନ୍ ଧାଡିରେ ଠିଆ ହୋଇଥିବାରୁ ସେମାନଙ୍କୁ କରୋନା ବଦଳରେ ଜଳାତଙ୍କ ଇଞ୍ଜେକସନ୍ ଦିଆଯାଇଥିଲା। ତେବେ ଫାର୍ମାସିଷ୍ଟ ଓ ନର୍ସମାନେ ସେମାନଙ୍କ ଓପିଡି ଟିକଟ୍ କିମ୍ବା କୁକୁର କାମୁଡା କ୍ଷତ ନ ଦେଖି ଇଞ୍ଜେକସନ୍ ଦେଇଥିଲେ। ଇଞ୍ଜେକସନ୍ ନେଇ ଘରକୁ ଯିବା ପରେ ଜଣେ ମହିଳାଙ୍କ ସ୍ବାସ୍ଥ୍ୟରେ ଅବନତି ଆସିବାରୁ ଏହି ତ୍ରୁଟି ସମ୍ପର୍କରେ ଜଣାପଡିଥିଲା।
