ପାଣାଜୀ : ଗୋଆରେ ରାଷ୍ଟ୍ରପତି ଶାସନ ଲାଗୁ କରିବାକୁ ଶିବସେନା ପକ୍ଷରୁ ଦାବି କରାଯାଇଛି। ଗୋଆ ମୁଖ୍ୟମନ୍ତ୍ରୀ ମନୋହର ପରିକର ସଂପ୍ରତି ଚିକିତ୍ସା ପାଇଁ ଆମେରିକା ଯାଇଥିବାରୁ ରାଜ୍ୟରେ ରାଷ୍ଟ୍ରପତି ଶାସନ ଜରୁରୀ ହୋଇପଡିଛି ବୋଲି ଗୋଆ ଶିବସେନା ଶାଖା ମୁଖପାତ୍ର ରାଖି ପ୍ରଭୁଦେଶାଇ ନାଏକ କହିଛନ୍ତି। ମୁଖ୍ୟମନ୍ତ୍ରୀଙ୍କ ଅନୁପସ୍ଥିତିରେ କୌଣସି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ନିଷ୍ପତ୍ତି ନେବାକୁ ଗୋଆ ସରକାର ଅକ୍ଷମ ହୋଇପଡିଛନ୍ତି ବୋଲି ଅଭିଯୋଗ ହୋଇଛି।
ଗୋଆରେ ବର୍ତ୍ତମାନ ଖଣି ସମସ୍ୟା ଉତ୍କଟ ରୂପ ଧାରଣ କରିଥିବାବେଳେ ରାଜ୍ୟବାସୀଙ୍କ ସ୍ୱାର୍ଥରକ୍ଷା କରିବାକୁ ସରକାର ମୁରବିବିହୀନ ହୋଇପଡିଛନ୍ତି। ଗୋଆରେ ଥିବା ୮୮ଟି ଲୁହାଖଣିର ଲିଜ୍ ନବୀକରଣକୁ ସୁପ୍ରିମକୋର୍ଟ ଗତ ଫେବୃଆରୀରେ ଖାରଜ କରିଦେଇଛନ୍ତି। ଲିଜ୍ ନବୀକରଣ ଓ ପରିବେଶ ମନ୍ତ୍ରଣାଳୟ ପକ୍ଷରୁ ସବୁଜ ସଙ୍କେତ ନ ମିଳିବା ପର୍ଯ୍ୟନ୍ତ ରାଜ୍ୟରେ ଥିବା ଏହି ଖଣିଗୁଡିକରୁ ମାର୍ଚ୍ଚ ୧୬ ପରେ ଲୁହାପଥର ଉତ୍ତୋଳନ ହୋଇପାରିବ ନାହିଁ ବୋଲି ସୁପ୍ରିମକୋର୍ଟ ସ୍ପଷ୍ଟ ନିର୍ଦେଶ ଦେଇଛନ୍ତି।
ଆମେରିକା ଯିବାପୂର୍ବରୁ ପ୍ରଶାସନିକ କାର୍ଯ୍ୟ ତଦାରଖ କରିବାକୁ ପରିକର ଏକ ତିନିଜଣିଆ କମିଟି ଗଠନ କରିଛନ୍ତି। ତେବେ ଏହି କମିଟି ଇତିମଧ୍ୟରେ ଥରେ ହେଲେ ବୈଠକରେ ମିଳିତ ହୋଇନଥିବା ଜଣାପଡିଛି।
