ଭୁବନେଶ୍ୱର:ରାଜ୍ୟ ସରକାରଙ୍କ ନିଜସ୍ବ ଖାଦ୍ୟ ସୁରକ୍ଷା ଯୋଜନାରୁ ଯେପରି କେହି ଯୋଗ୍ୟ ହିତାଧିକାରୀ ବାଦ ନପଡ଼ନ୍ତି ସେଥିପ୍ରତି ଗୁରୁତ୍ବ ଦେବାକୁ ସରକାର ସମସ୍ତ ଜିଲାପାଳଙ୍କୁ ନିର୍ଦେଶ ଦେଇଛନ୍ତି।
ଅକ୍ଟୋବର ୨ ତାରିଖ ଗାନ୍ଧି ଜୟନ୍ତୀରେ ୨୫ ଲକ୍ଷ ହିତାଧିକାରୀଙ୍କୁ ଏହି ଯୋଜନାରେ ଖାଦ୍ୟଶସ୍ୟ ପ୍ରଦାନ ନେଇ ସରକାର ସ୍ଥିର କରିଛନ୍ତି। ତେଣୁ ଏହା ପୂର୍ବରୁ ଯୋଗ୍ୟ ହିତାଧିକାରୀ ଚିହ୍ନଟ କରି ସେମାନଙ୍କୁ ରେସନକାର୍ଡ ଯୋଗାଇ ଦେବାକୁ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ ଜିଲାପାଳମାନଙ୍କୁ ନିର୍ଦେଶ ଦେଇଛନ୍ତି।
ଗୁରୁବାର ଭିଡିଓ କନଫରେନ୍ସ ମାଧ୍ୟମରେ ଶ୍ରୀ ପାଢ଼ୀ ସମସ୍ତ ଜିଲାପାଳଙ୍କ ସହ ଆଲୋଚନା କରିଥିଲେ। ବିଭିନ୍ନ ଜିଲାରେ ହିତାଧିକାରୀ ଚିହ୍ନଟ ସନ୍ତୋଷଜନକ ନଥିବାରୁ ଧାର୍ଯ୍ୟ ସମୟ ମଧ୍ୟରେ ଏହି କାର୍ଯ୍ୟ ସାରିବାକୁ ସେ କହିଛନ୍ତି। ଗାନ୍ଧି ଜୟନ୍ତୀ ଦିନ ଏହି ୨୫ ଲକ୍ଷ ହିତାଧିକାରୀ ଖାଦ୍ୟଶସ୍ୟ ପାଇବେ। ଏହାକୁ ଲକ୍ଷ୍ୟ ରଖି ଆନୁଷଙ୍ଗିକ କାର୍ଯ୍ୟ ସାରିବାକୁ ସେ କହିଛନ୍ତି।
ହିତାଧିକାରୀ ଚିହ୍ନଟ ସଂକ୍ରାନ୍ତ ସମସ୍ତ ନିୟମାବଳୀ ଜିଲାପାଳମାନଙ୍କ ନିକଟକୁ ପଠାଯାଇଛି। ଏଥିରେ ଅବହେଳାକୁ ଆଦୌ ବରଦାସ୍ତ କରାଯିବ ନାହିଁ ବୋଲି ସେ କଡ଼ା ଚେତାବନୀ ଦେଇଛନ୍ତି।
