ଆଜି ହେଉଛି ଜାତୀୟ କୃଷକ ଦିବସ। ଭାରତର ୫ମ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂହଙ୍କ ଜୟନ୍ତୀ ଅବସରରେ ପ୍ରତିବର୍ଷ ଡିସେମ୍ବର ୨୩ରେ ଏହି ଦିବସ ପାଳନ କରାଯାଉଛି। ଚରଣ ସିଂହ ନିଜ କାର୍ଯ୍ୟକାଳ ସମୟରେ କୃଷି କ୍ଷେତୟରେ ସୁଧାର ପାଇଁ ଗୁରୁତ୍ଵପୂର୍ଣ୍ଣ ଭୂମିକା ନିର୍ବାହ କରିଥିଲେ। କିନ୍ତୁ ଆଜି ପରିସ୍ଥିତି ଭିନ୍ନ। ଯେଉଁମାନଙ୍କ ପାଇଁ ଆଜିର ଦିନଟି ପାଳନ କରାଯାଉଛି ସେମାନେ ଆଜି ହତାଶ। ନିଜର ହକ୍ ପାଇଁ ଚାଷୀ ରାସ୍ତାରେ ବସି ଆନ୍ଦୋଳନ କରୁଛି।
କେନ୍ଦ୍ର ସରକାରଙ୍କ ୩ଟି ନୂଆ କୃଷି ଆଇନ ବିରୋଧରେ ଅନ୍ନଦାତା ମାସେ ହେଲା ଆନ୍ଦୋଳନ ଚଳାଇଛନ୍ତି। ଦିଲ୍ଲୀର ବିଭିନ୍ନ ସୀମାରେ ପ୍ରବଳ ଥଣ୍ଡାରେ ରାସ୍ତାରେ ବସି ଧାରଣା ଦେଉଛନ୍ତି। ଅନେକ ଚାଷୀଙ୍କ ଜୀବନ ଚାଲି ଗଲାଣି, ତଥାପି ସମସ୍ୟାର ସମାଧାନ ହୋଇପାରି ନାହିଁ।
आज किसान दिवस के अवसर मैं देश के सभी अन्नदाताओं का अभिनंदन करता हूँ। उन्होंने देश को खाद्य सुरक्षा का कवच प्रदान किया है।
कृषि क़ानूनों को लेकर कुछ किसान आंदोलनरत हैं। सरकार उनसे पूरी संवेदनशीलता के साथ बात कर रही है। मैं आशा करता हूँ कि वे जल्द ही अपने आंदोलन को वापिस लेगें।
— Rajnath Singh (@rajnathsingh) December 23, 2020
ତେବେ କୃଷକ ଦିବସ ଅବସରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ସମସ୍ତ କୃଷକଙ୍କୁ ଅଭିନନ୍ଦନ ଜଣାଇଛନ୍ତି। ସରକାର କୃଷକମାନଙ୍କ ସହିତ ଆଲୋଚନା ଜାରି ରଖିଛନ୍ତି। ସେମାନେ ଖୁବଶୀଘ୍ର ଆନ୍ଦୋଳନ ପ୍ରତ୍ୟାହାର କରିବେ ବୋଲି ରାଜନାଥ କହିଛନ୍ତି। ସେ ଆହୁରି କହିଛନ୍ତି, ପୂର୍ବତନ ପ୍ରଧାନମନ୍ତ୍ରୀ ତଥା ଦେଶର ସବୁଠୁ ସମ୍ମାନନୀୟ ଆଗଧାଡ଼ିର କୃଷକ ନେତା ଚୌଧୁରୀ ଚରଣ ସିଂହଙ୍କ ଜୟନ୍ତୀ ଅବସରରେ ତାଙ୍କୁ ସ୍ମରଣ କରି ପ୍ରଣାମ ଜଣାଉଛି।
ରାଜନାଥ କହିଛନ୍ତି, ଚରଣ ସିଂହ ଆଜୀବନ କୃଷକମାନଙ୍କ ସମସ୍ୟା ପ୍ରତି ସ୍ବର ଉଠାଉଥିଲେ ଏବଂ ସେମାନଙ୍କ କଲ୍ୟାଣ ପାଇଁ କାମ କରୁଥିଲେ। ତାଙ୍କର ଯୋଗଦାନକୁ ଦେଶ ସର୍ବଦା ମନେରଖିବ। ଚରଣ ସିଂହ ଚାହୁଁଥିଲେ ଦେଶର କୃଷକମାନଙ୍କ ରୋଜଗାର ବୃଦ୍ଧି ପାଉ, ସେମାନଙ୍କ ଫସଲର ଲାଭକରୀ ମୂଲ୍ୟ ମିଳୁ ଏବଂ କୃଷକଙ୍କ ମାନସମ୍ମାନ ସୁରକ୍ଷିତ ରହୁ। ଆମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚରଣ ସିଂହଙ୍କ ପ୍ରେରଣାରେ ହିଁ କୃଷକମାନଙ୍କ ହିତରେ ବିଭିନ୍ନ ପଦକ୍ଷେପ ନେଉଛନ୍ତି। ପ୍ରଧାନମନ୍ତ୍ରୀ କୌଣସି ପରିସ୍ଥିତିରେ ବି କୃଷକମାନଙ୍କ କ୍ଷତି ହେବାକୁ ଦେବେନାହିଁ।
