ବଲାଙ୍ଗିର : ବଲାଙ୍ଗିର- କଳାହାଣ୍ଡି ଜିଲା ସୀମାନ୍ତ ଗୁଡଭେଲା ବ୍ଲକର ଜମ୍ଭେଲ ଛକରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଏକ ବାଇକ୍କୁ ବୋଲେରୋ ଧକ୍କା ଦେବା ଫଳରେ ଘଟଣା ସ୍ଥଳରେ ବାପ-ପୁଅଙ୍କ ମୃତ୍ୟୁ ହୋଇଥିବା ବେଳେ ମା’ ଓ ସାନ ପୁଅ ଗୁରୁତର ହୋଇ ହସ୍ପିଟାଲରେ ଜୀବନ-ମୃତ୍ୟୁ ସହ ସଂଘର୍ଷ କରୁଛନ୍ତି। ଦୁର୍ଘଟଣା ପରେ ବାଇକ୍ଟି ଜଳିଯାଇଛି।
ମିଳିଥିବା ସୂଚନା ଅନୁସାରେ ଶୁକ୍ରବାର ଦିନ ଅଢେଇଟା ସମୟରେ ଦଉଲଗୁଡି ପଟୁ ଆସୁଥିବା ଆର୍ ୧୭ସି ୬୭୬୭ ନମ୍ବର ବୋଲେରୋ( ଗୁଡଭେଲା କୋଭିଡ ଡ୍ୟୁଟିରେ ନିୟୋଜିତ) ଗାଡି ତୁଷୁରା ପଟୁ ଯାଉଥିବା ଏକ ବାଇକକୁ ଧକ୍କା ଦେଇଥିଲା। ଆଉ ଧକ୍କା ଦେବା ମାତ୍ରେ ବାଇକରେ ନିଆଁ ଲାଗିଯାଇଥିଲା । ତେବେ ଘଟଣାସ୍ଥଳରେ ବାପା ଓ ତିନି ବର୍ଷର ଶିଶୁପୁତ୍ରର ମୃତ୍ୟୁ ହୋଇଥିବାବେଳେ ମା ଓ ବର୍ଷକର ପୁତ୍ର ଗୁରୁତର ଆହତ ହୋଇଛନ୍ତି। ସେମାନଙ୍କୁ ଗୁରୁତର ଅବସ୍ଥାରେ ତୁଷୁରା ଡାକ୍ତରଖାନାରେ ଭର୍ତ୍ତି କରାଯାଇଛି। ଦୁର୍ଘଟଣା ପରେ ବୋଲେରୋରେ ଥିବା ଲୋକେ ଫେରାର ହୋଇଯାଇଥିଲେ। ତୁଷୁରା ଥାନା ଅଧିକାରୀ ଯଶବନ୍ତ ପ୍ରଧାନ ଓ ଅନ୍ୟ ପୁଲିସ ଘଟଣା ସ୍ଥଳରେ ପହଞ୍ଚି ଗାଡି ଚଳାଚଳ ସ୍ବାଭାବିକ କରିଥିଲେ। ମୃତ ମାନକୁନୁ ରିଷିଡାର ଏକ ପେଟ୍ରୋଲ ପମ୍ପରେ କାମ କରନ୍ତି। ତାଙ୍କ ମୃତ୍ୟୁରେ ରିଷିଡାରେ ଶୋକ ପ୍ରକାଶ ପାଇଛି।
Comments are closed.