ପୁରୀ ବେଳାଭୂମିରେ ଆୟୋଜିତ ବ୍ଲୁଫ୍ଲାଗ ବିଚରେ କରୋନା ସଂକ୍ରମଣରୁ ସୁସ୍ଥ ହୋଇଥିବା ୨ ଶହ ଜଣଙ୍କୁ ଯୋଗ ଶିକ୍ଷା ଦିଆଯାଇଛି। କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା ଓ ପୁରୀ ବିଧାୟକ ଜୟନ୍ତ କୁମାର ଷଡଙ୍ଗୀ ମଧ୍ୟ ଏଥିରେ ସାମିଲ ହୋଇ ଆଜି ଯୋଗାଭ୍ୟାସ କରିଛନ୍ତି। ଭାରତ ସରକାରଙ୍କ ଆୟୁଷ ବିଭାଗ ଓ ରାଜ୍ୟ ପ୍ରଶାସନର ନିର୍ଦ୍ଦେଶାବଳୀ ଅନୁଯାୟୀ ଜିଲ୍ଲା ପ୍ରଶାସନ ଶନିବାର ଓ ରବିବାର ଦୁଇଦିନ ଧରି ଏହି ଶିବିର ଆୟୋଜନ କରିଥିଲା।
ପୁରୀ ଜିଲ୍ଲାପାଳ ବଲବନ୍ତ ସିଂ କହିଛନ୍ତି ଯେ କରୋନା ରୋଗକୁ ପ୍ରତିରୋଧ କରିବା ପାଇଁ ଯୋଗ ମହୌଷଧି ଭଳି କାମ ଦେବ। ଏହି ଶିବିରରେ ୧୦ଟି ପେଣ୍ଡାଲ କାଠରେ କରାଯାଇଥିଲା। ପ୍ରତି ପେଣ୍ଡାଲରେ ଜଣେ ଯୋଗ ଶିକ୍ଷକ ୨୦ ଜଣ ଶିକ୍ଷାର୍ଥୀଙ୍କୁ ଯୋଗ ଶିକ୍ଷା ଦେଇଥିଲେ। ପ୍ରାଣାୟମ, ଓଲମ ବିଲମ, କପାଳ ଭାତୀ ଆଦି ୨୫ ପ୍ରକାର ଯୋଗ ଶିକ୍ଷା ଦିଆଯାଇଥିଲା। ଏହି ଯୋଗ ଶିବିରରେ ସେବାୟତ, ପୁଲିସ, ସରକାରୀ କର୍ମଚାରୀ, ଗଣମାଧ୍ୟମ ପ୍ରତିନିଧି ଓ ସାଧାରଣ ଜନତା ଯୋଗ ଦେଇଥିଲେ।
