ଗୁରୁଡିଝାଟିଆ/ଟାଙ୍ଗି : ଚୌଦ୍ୱାର ବ୍ଲକର କଖଡି ପଞ୍ଚାୟତ ମହାନଦୀର ବନ୍ୟା ପାଇଁ ଜଳବନ୍ଦୀ ଭାବରେ ରହିଛି। ମହାନଦୀର ବନ୍ୟାଜଳ ପାଇଁ ଏହି ପଞ୍ଚାୟତର ଦୁଇଗାଁର ଜନସାଧାରଣ ଗତ ୩ ଦିନ ଧରି ଘରୁ ବାହାରକୁ ବାହାରି ପାରୁନାହାନ୍ତି । ଗୋପିନାଥପଡା ଗାଁର ସଂପୂର୍ଣ୍ଣ ଭାବରେ ମହାନଦୀର ବନ୍ୟାଜଳ ପଶି ରହିଛି। ଘରେ ବନ୍ୟାଜଳ ପଶିବା ଫଳରେ ଲୋକମାନେ ନାହିଁନଥିବା ଅସୁବିଧାର ସମ୍ମୁଖିନ ହେଉଛନ୍ତି। ରୋଷେଇ କରି ଖାଇବା ମଧ୍ୟ ସମ୍ଭବ ହେଉନାହିଁ। ତିନିଦିନ ଧରି ଗାଁର ଜନସାଧାରଣ ବନ୍ୟାଜଳ ପାଇଁ ବହୁ ଅସୁବିଧାରେ ରହିଥିଲେ ବି ଆଜି କଟକ ସଦର ତହସିଲଦାର ସମ୍ବିତ କୁମାର ଗଡନାୟକଙ୍କ ନିର୍ଦ୍ଦେଶକ୍ରମେ ରାଜସ୍ୱ ନିରୀକ୍ଷକ ଯଶୋବନ୍ତ ପ୍ରଧାନ ଗାଁ ଭିତରକୁ ଯାଇ ଲୋକମାନଙ୍କ ଦୁର୍ଦ୍ଦଶାକୁ ନିଜେ ଅଙ୍ଗେ ଲିଭାଇଛନ୍ତି। ହେଲେ ସରକାରଙ୍କ ପକ୍ଷରୁ କୌଣସି ସହାୟତା ଏପର୍ଯ୍ୟନ୍ତ ଯୋଗାଇ ଦିଆଯାଇନାହିଁ। ଗାଁରେ ଲୋକମାନେ କାହା ଛାତ ଉପରେ ଆଶ୍ରୟ ନେଇଛନ୍ତି ତ ଆଉ କେହି ଘରଛାଡି ଘଣ୍ଟିଖାଲ ଗାଁକୁ ପଳାଇଛନ୍ତି। ସାପ ଭୟ ସାଙ୍ଗକୁ ଭୋକ ଉପାସରେ ଲୋକମାନେ ରହିଛନ୍ତି। ରାଜସ୍ୱ ନିରୀକ୍ଷକ ଶ୍ରୀ ପ୍ରଧାନଙ୍କ ଏହି ଗ୍ରସ୍ତକାଳରେ ସ୍ଥାନୀୟ ସରପଞ୍ଚଙ୍କ ପ୍ରତିନିଧି ବେଣୁଧର ମହାନ୍ତି, ପୂର୍ବତନ ସମିତିସଭ୍ୟ ନରେନ୍ଦ୍ର ସାହୁ, ଜିଆରଏସ କିରଣ ଚନ୍ଦ୍ର ସାହୁ ଓ ଅନ୍ୟକର୍ମକର୍ତ୍ତାମାନେ ଉପସ୍ଥିତ ଥିଲେ। ପ୍ରକାଶଯୋଗ୍ୟ, ଗୋପିନାଥପଡା ଗାଁରେ ଅନୁସୂଚିତ ଜାତି ସହିତ ସାଧାରଣବର୍ଗର ଲୋକମାନଙ୍କୁ ମିଶାଇ ମୋଟ ୪୦ ପରିବାରର ୨ଶହ ଲୋକ ବସବାସ କରିଥାନ୍ତି।
Comments are closed.