ସୋର: ୧୯ ଦିନ ବିତିଲା ସ୍ୱାମୀଙ୍କ ମୋବାଇଲ ସୁଇଚ୍ ଅଫ୍। ଏହି ଘଟଣା ପରେ ସ୍ବାମୀଙ୍କ ଖୋଜ୍ଖବର ପାଇଁ କେନ୍ଦ୍ର ଗୃହମନ୍ତ୍ରୀଙ୍କୁ ନିବେଦନ କରିବା ସହିତ ବାଲେଶ୍ବର ଜିଲା ପୁଲିସକୁ ମଧ୍ୟ ସଂପୃକ୍ତ ନିଖୋଜଙ୍କ ସ୍ତ୍ରୀ ନିବେଦନ କରିଛନ୍ତି। ସୋର ଗୋପୀନାଥପୁର ଗ୍ରାମର ପ୍ରଦୀପ ମୁଦୁଲି ମୁମ୍ବଇର ୱାଲ୍ଭିରେ ଶ୍ରମିକ ଭାବେ ଟ୍ରର୍ମିନାଲ ଟେକ୍ନୋଲୋଜି ପ୍ରାଇଭେଟ କମ୍ପାନୀରେ କାର୍ୟ୍ୟ କରୁଥିଲେ। ସେ ଗତ ୨୦ ବର୍ଷ ଧରି ମୁମ୍ବଇରେ ରହିଆସୁଛନ୍ତି। ଗତ ଜୁନ ୨୬ ତାରିଖରେ ଶେଷ ଥର ପାଇଁ ଗୋପୀନାଥପୁରରେ ରହୁଥିବା ସ୍ତ୍ରୀ ରଶ୍ମିତାଙ୍କ ସହିତ କଥା ହୋଇଥିଲେ। ସେହିଦିନରୁ ପ୍ରଦୀପଙ୍କ ମୋବାଇଲ ସୁଇଚ ଅଫ୍ ରହିଛି।
ମୁମ୍ବଇରେ ଥିବା ପ୍ରଦୀପଙ୍କ ସାଙ୍ଗମାନଙ୍କୁ ପଚାରିବାରୁ ଗତ ଜୁନ ୨୬ ତାରିଖରେ ତାଙ୍କ ଭଡ଼ା ଘରୁ ସକାଳେ ବାହାରକୁ ଗଲାବେଳେ ଫେରିବା ଡେରି ହେବ ବୋଲି କହିଥିଲେ। ମାତ୍ର ସେବେଠାରୁ ତାଙ୍କର କୌଣସି ଖୋଜ୍ଖବର ମିଳୁ ନ ଥିବା ଜଣାପଡିଛି। କୋଭିଡ-୧୯ ସମୟରେ ମୁମ୍ବଇ ଯିବା ସମ୍ଭବ ହେଉ ନ ଥିବାରୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସ୍ତ୍ରୀ ରଶ୍ମିତା ପତ୍ର ଲେଖି ସ୍ୱାମୀଙ୍କୁ ଖୋଜିବା ପାଇଁ ନିବେଦନ କରିଛନ୍ତି।
