ଦେଶରେ କରୋନା ପରିସ୍ଥିତି ଦିନକୁ ଦିନ ବୃଦ୍ଧି ପାଉଥିବା ବେଳେ ଏବଂ ଦୀର୍ଘ ୪ ମାସ ହେବ ବିଦ୍ୟାଳୟଗୁଡିକ ବନ୍ଦ ରହିଥିବା ଦୃଷ୍ଟିରୁ ଛାତ୍ରଛାତ୍ରୀଙ୍କ ଭବିଷ୍ୟତକୁ ଦୃଷ୍ଟିରେ ରଖି କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ, ସିବିଏସଇ ନବମରୁ ଦ୍ୱାଦଶ ଶ୍ରେଣୀ ଯାଏଁ ପାଠ୍ୟକ୍ରମ ୩୦ ପ୍ରତିଶତ ହ୍ରାସ କରିଛି। ଏ ନେଇ ସିବିଏସଇ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ଯେ କରୋନା ମହାମାରୀକୁ ଦୃଷ୍ଟିରେ ରଖି ୨୦୨୦-୨୧ ଶିକ୍ଷା ବର୍ଷ ପାଇଁ ନବମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସିଲାବସରେ ସଂଶୋଧନ କରାଯାଇଛି।
ସିବିଏସଇ ବୋର୍ଡ ଅଧୀନରେ ଥିବା ବିଶେଷଜ୍ଞ କମିଟି ଓ ସିଲାବସ କମିଟିର ସୁପାରିଶ ଅନୁଯାୟୀ ଏଭଳି ବ୍ୟବସ୍ଥା କରାଯାଇଛି। ତେବେ ହ୍ରାସ ହୋଇଥିବା ସିଲାବସ୍ ଆଭ୍ୟନ୍ତରୀଣ ମୂଲ୍ୟାଙ୍କନ ଏବଂ ବର୍ଷ ଶେଷ ବୋର୍ଡ ପରୀକ୍ଷା ପାଇଁ ବିଷୟଗୁଡିକରେ ଅନ୍ତର୍ଭୁକ୍ତ ହେବ ନାହିଁ। ଅନ୍ୟ ପକ୍ଷରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ପାଠ୍ୟ ସିଲାବସ ଏନସିଇଆରଟି ଦ୍ୱାରା ନିର୍ଦ୍ଧାରିତ ବିକଳ୍ପ ବ୍ୟବସ୍ଥା ଅନୁଯାୟୀ ସ୍ଥିର କରାଯିବ।
