ୱାଶିଂଟନ: ପୂର୍ବ ଲଦାଖର ଗଲୱାନ ଘାଟିରେ ଭାରତୀୟ ଏବଂ ଚୀନ ସୈନ୍ୟଙ୍କ ମଧ୍ୟରେ ସଂଘର୍ଷ ଘଟିବା ପରେ ଦୁଇ ଦେଶର ସେନା ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ତେବେ ଦୁଇ ଦେଶ ଏହି ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ଉଦ୍ୟମ ଚଳାଇଥିବାବେଳେ ଏହାକୁ ସମର୍ଥନ କରିଛି ଆମେରିକା। ଆମେରିକା ବିଦେଶ ମନ୍ତ୍ରଣାଳୟ ପକ୍ଷରୁ ଏକ ବିବୃତି ଜାରି କରାଯାଇ କୁହାଯାଇଛି, ଭାରତ-ଚୀନ ସୀମା ବିବାଦ ଉପରେ ଆମେରିକା ନଜର ରଖିଛି। ମନ୍ତ୍ରଣାଳୟର ମୁଖପାତ୍ର କହିଛନ୍ତି, ଆମେ ଜାଣିବାକୁ ପାଇଛୁ ଯେ, ଭାରତୀୟ ସେନା ଘୋଷଣା କରିଛି ତା’ର ୨୦ ଯବାନ ଶହୀଦ ହୋଇଛନ୍ତି। ଆମେ ଶହୀଦ ଯବାନଙ୍କ ପରିବାର ପ୍ରତି ସମବେଦନା ଜଣାଉଛୁ।
ଭାରତ ଏବଂ ଚୀନ ଉଭୟେ ଉତ୍ତେଜନା ହ୍ରାସ କରିବାକୁ ଇଚ୍ଛା ବ୍ୟକ୍ତ କରିଛନ୍ତି ଏବଂ ଆମେ ବର୍ତ୍ତମାନ ସ୍ଥିତିର ଶାନ୍ତପୂର୍ଣ୍ଣ ସମାଧାନର ସମର୍ଥନ କରୁଛୁ। ଗତ ୨ ତାରିଖରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ଫୋନରେ ହୋଇଥିବା କଥାବାର୍ତ୍ତାରେ ଭାରତ-ଚୀନ ସୀମା ସମ୍ପର୍କରେ ଆଲୋଚନା ହୋଇଥିଲା। ସୂଚନାଯୋଗ୍ୟ, ଭାରତୀୟ ସେନା ମଙ୍ଗଳବାର କହିଥିଲା ଯେ, ଚୀନ ସୈନିକଙ୍କ ସହିତ ଗଲୱାନ ଘାଟିରେ ହୋଇଥିବା ହିଂସାକାଣ୍ଡରେ ୨୦ ଯବାନ ଶହୀଦ ହୋଇଛନ୍ତି। ଚୀନର ମଧ୍ୟ ୪୩ ଯବାନ ନିହତ ହୋଇଛନ୍ତି।
