ଗର୍ଭବତୀ ମହିଳାଙ୍କ ପାଇଁ ସ୍ବତନ୍ତ୍ର କ୍ୱାରେନ୍‌ଣ୍ଟାଇନ୍ ସେଣ୍ଟର ; ଛତିଶଗଡରେ ପ୍ରଥମ

ରାୟପୁର : ଛତିଶଗଡର ବିଲାସପୁରରେ ଗର୍ଭବତୀ ମହିଳାଙ୍କ ପାଇଁ ଏକ ସ୍ୱତନ୍ତ୍ର ପୃଥକ କେନ୍ଦ୍ର ପ୍ରତିଷ୍ଠା କରାଯାଇଛି। ଏହା ଦେଶରେ ପ୍ରଥମ ବୋଲି ଜଣାପଡିଛି। ସେଠାକାର ଅଧିକାରୀମାନେ ରବିବାର ଏହି ସୂଚନା ଦେଇଛନ୍ତି।

ଜନସମ୍ପର୍କ ବିଭାଗର ଜଣେ ଅଧିକାରୀ କହିଛନ୍ତି ଯେ, ଏଠାରୁ ପ୍ରାୟ ୧୨୦ କିଲୋମିଟର ଦୂରରେ ଥିବା କେସଲା ଗ୍ରାମରେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଏକ ପୃଥକ ଭାବେ ଗର୍ଭବତୀ ମହିଳାଙ୍କ ପାଇଁ କ୍ୱାରେନ୍‌ଣ୍ଟାଇନ୍ ସେଣ୍ଟର ନିର୍ମାଣ କରାଯାଇଛି। ବର୍ତ୍ତମାନ ଆଠ ଜଣ ଗର୍ଭବତୀ ମହିଳା ସେଠାରେ ରହିଛନ୍ତି। ସେମାନେ ସମସ୍ତେ ପ୍ରବାସୀ ଶ୍ରମିକ ଯେଉଁମାନେ ଅନ୍ୟ ରାଜ୍ୟରୁ ଏଠାକୁ ଆସିଥିଲେ |

ସେ କହିଛନ୍ତି, ‘ମୁଖ୍ୟମନ୍ତ୍ରୀ ଭୁପେଶ ବାଗେଲଙ୍କ ନିର୍ଦ୍ଦେଶରେ ଗର୍ଭବତୀ ମହିଳା, ଶିଶୁ ଏବଂ ବରିଷ୍ଠ ନାଗରିକଙ୍କୁ ପୃଥକ କେନ୍ଦ୍ରରେ ସ୍ୱତନ୍ତ୍ର ସୁବିଧା ଯୋଗାଇ ଦିଆଯାଉଛି। ବିଲାସପୁର ଜିଲ୍ଲାର କେସଲା ଗ୍ରାମରେ ଗର୍ଭବତୀ ମହିଳାଙ୍କ ପାଇଁ ପ୍ରଥମ ପୃଥକ କେନ୍ଦ୍ର ପ୍ରତିଷ୍ଠା କରାଯାଇଛି।

ଅଧିକାରୀ ଜଣଙ୍କ ଆହୁରି କହିଛନ୍ତି ଯେ, କେନ୍ଦ୍ରରେ ପୁଷ୍ଟିକର ଖାଦ୍ୟ, ସ୍କ୍ରିନିଂ ସୁବିଧା ଏବଂ ସୁରକ୍ଷାର ବ୍ୟବସ୍ଥା କରାଯାଇଛି। ଦିନକୁ ତିନି ଥର କେନ୍ଦ୍ରକୁ ସଫା କରାଯାଉଛି। ୨୪ ଘଣ୍ଟିଆ ଡାକ୍ତରୀ କର୍ମଚାରୀଙ୍କୁ ନିୟୋଜିତ କରାଯାଇଛି। ଶନିବାର ସୁଦ୍ଧା ରାଜ୍ୟର ୧୯,୭୩୨ଟି ପୃଥକ କେନ୍ଦ୍ରରେ ୨,୩୧,୫୩୬ ଜଣ ଲୋକଙ୍କୁ ରଖାଯାଇଛି। ସମସ୍ତେ ପ୍ରାୟ ପ୍ରବାସୀ ଶ୍ରମିକ। ବର୍ତ୍ତମାନ ସୁଦ୍ଧା ଛତିଶଗଡରେ ୯୯୭ ଜଣ କରୋନା ସଂକ୍ରମିତ ହୋଇଥିବା ଜଣାପଡିଛି। ଏହି ଲୋକମାନଙ୍କ ମଧ୍ୟରୁ ୭୩୪ ଜଣ ଚିକିତ୍ସାଧୀନ ଅବସ୍ଥାରେ ରହିଛନ୍ତି। ୨୫୯ ଜଣ ଲୋକ ସୁସ୍ଥ ହୋଇଛନ୍ତି ଓ ୪ ଜଣଙ୍କର ମୃତ୍ୟୁ ହୋଇଛି।