ନୂଆଦିଲ୍ଲୀ : ମଇ ୧ରୁ ଅଦ୍ୟାବଧି ରେଳବାଇ ପକ୍ଷରୁ ୧ହଜାରରୁ ଅଧିକ ଶ୍ରମିକ ସ୍ବତନ୍ତ୍ର ରେଳ ଚଳାଚଳ ସହ ୧୪ ଲକ୍ଷ ଶ୍ରମିକଙ୍କୁ ନିଜ ରାଜ୍ୟରେ ପହଞ୍ଚାଇବା ବ୍ୟବସ୍ଥା କରାଯାଇଛି। କେବଳ ମହାରାଷ୍ଟ୍ରରୁ ୧୦ହଜାର ବସ୍ରେ ଦେଢ଼ ଲକ୍ଷ ଶ୍ରମିକ ବିଭିନ୍ନ ସ୍ଥାନକୁ ଫେରିଲେଣି। ଏହା ସତ୍ତ୍ବେ ଘରକୁ ଫେରିବା ପାଇଁ ବ୍ୟଗ୍ର ଶ୍ରମିକମାନେ ଟ୍ରକ୍, ଅଟୋରିକ୍ସା କିମ୍ବା ଯେକୌଣସି ଯାନ ଯୋଗେ ହଜାର ହଜାର ସଂଖ୍ୟାରେ ଘରକୁ ଫେରିବାରେ ଲାଗିଛନ୍ତିି। ସେଥିଯୋଗୁଁ ଦୁର୍ଘଟଣାରେ ମାସକ ମଧ୍ୟରେ ପ୍ରାୟ ୧୨୦ ଶ୍ରମିକଙ୍କ ପ୍ରାଣହାନି ଘଟିଲାଣି। ମୃତାହତଙ୍କ ମଧ୍ୟରେ ଅଧିକାଂଶ ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ମଧ୍ୟପ୍ରଦେଶ, ଉତ୍ତରପ୍ରଦେଶ ଓ ଓଡ଼ିଶା ଭଳି ରାଜ୍ୟର ବୋଲି ଜଣାପଡ଼ିଛି। ରେଳଗାଡ଼ିକୁ ଅପେକ୍ଷା ନ କରି ଶ୍ରମିକମାନେ କାହିଁକି ବିପଦପୂର୍ଣ୍ଣ ଭାବେ ଫେରୁଛନ୍ତି ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠୁଛି। ରେଳ ଟିକଟ ପାଇଁ ଅସମ୍ଭବ ଭିଡ଼, ଟିକଟ ନ ମିଳିବା ଯୋଗୁଁ ଅଧୈର୍ଯ୍ୟ ଶ୍ରମିକମାନେ ଯେକୌଣସି ଉପାୟରେ ଘରକୁ ଫେରିବା ପାଇଁ ନିଷ୍ପତ୍ତି ନେଉଛନ୍ତି। ପୁନଶ୍ଚ ନିଜ ରାଜ୍ୟକୁ ଫେରିବା ପାଇଁ ଅନ୍ଲାଇନ୍ରେ ପଞ୍ଜୀକରଣ କରିବା ଓ ଅନୁମତି ପାଇବା ସହଜ ହେଉ ନାହିଁ। ଗୋଟିଏ ଅଟୋରିକ୍ସାରେ ୫ଜଣଙ୍କ ସ୍ଥାନରେ ୨୦ଜଣ ଓ ବଡ଼ ଅଟୋରେ ୨୫ରୁ ୩୦ ଜଣ ଲଦାଲଦି ହୋଇ ଆସୁଛନ୍ତି। ଛୋଟ ଟ୍ରକ୍ରେ ୪୦ରୁ ୬୦ ଓ ବଡ଼ ଟ୍ରକ୍ରେ ପ୍ରାୟ ୧୦୦ଜଣ ପଣ୍ୟଦ୍ରବ୍ୟ ଭଳି ଫେରୁଛନ୍ତି। ଟ୍ରକ୍ ଉପରେ ମଧ୍ୟ ଅନେକ ବିପଜ୍ଜନକ ଭାବେ ଫେରୁଛନ୍ତି। ଏଥିପାଇଁ ୧୫୦୦ରୁ ୫ହଜାର ଟଙ୍କା ପର୍ଯ୍ୟନ୍ତ ବିପୁଳ ବ୍ୟୟ କରୁଥିଲେ ମଧ୍ୟ ପରବାୟ କରୁ ନାହାନ୍ତି। ସରକାରଙ୍କ ସ୍ପଷ୍ଟ ନୀତି ଅଭାବରୁ ଏଭଳି ଜଟିଳ ପରିସ୍ଥିତି ସୃଷ୍ଟି ହୋଇଥିବା ବିଶେଷଜ୍ଞମାନେ କହୁଛନ୍ତି।
Popular Categories
Previous article
Next article