ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜିକାଲି ମାସ୍କ ବଦଳରେ ମୁହଁରେ ଗାମୁଛା ବାନ୍ଧି ବାହାରୁଥିବା ଦେଖିବାକୁ ମିଳୁଛି । ମାତ୍ର ଆମେରିକାରେ କରୋନା ସ୍ଥିତି ଅତ୍ୟନ୍ତ ଗମ୍ଭୀର ହୋଇଥିବା ସତ୍ବେ ରାଷ୍ଟ୍ରପତି ଟ୍ରମ୍ପ ମାସ୍କ ପିନ୍ଧୁ ନାହାନ୍ତି । ତେଣୁ ତାଙ୍କୁ ମୁହଁରେ ଗାମୁଛା ବାନ୍ଧିବାକୁ ପରାମର୍ଶ ଦେଇଛନ୍ତି ବାରଣାସୀର କିଛି ଡ଼ାକ୍ତର । ଖାଲି ସେତିକି ନୁହେଁ ବାରଣାସୀ (ବନାରସ)ର କିଛି ଡ଼ାକ୍ତର ଏକ ବନାରସୀ ଗାମୁଛାକୁ ଟ୍ରମ୍ପଙ୍କ ନିକଟକୁ ପଠାଇଛନ୍ତି। କୋରୋନାରୁ ବଞ୍ଚିବାକୁ ହେଲେ ଆପଣଙ୍କୁ ଏହି ଗାମୁଛା ପିନ୍ଧିବାକୁ ପଡ଼ିବ ବୋଲି ଗାମୁଛା ସହ ଏକ ଚିଠି ମଧ୍ୟ ପଠାଇଛନ୍ତି ।
ବାରଣାସୀ ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂସଦୀୟ କ୍ଷେତ୍ର । କୋରୋନାରୁ ବର୍ତ୍ତିବା ପାଇଁ ପ୍ରଧାନମନ୍ତ୍ରୀ ମୁହଁରେ ଗାମୁଛା ବାନ୍ଧିବାକୁ ଲୋକମାନଙ୍କୁ ପରାମର୍ଶ ଦେଇଥିଲେ । ବାରଣାସୀର ଜଣେ ଡାକ୍ତର ଉତ୍ତମ ଓଝା କହିଥିଲେ ଗାମୁଛା ବନାରସର ଏକ ପରମ୍ପରାଗତ ବସ୍ତ୍ର ଓ ଏହାକୁ ବାରଣାସୀ ଲୋକ ବିଭିନ୍ନ କାର୍ଯ୍ୟ ପାଇଁ ବ୍ୟବହାର କରିଥାନ୍ତି ।ସେ ଆହୁରି ମଧ୍ୟ କହିଥିଲେ କି, ଆମେରିକାର ରାଷ୍ଟ୍ରପତି ଏହାକୁ ଏକ ସକରାତ୍ମକ ମନୋଭାବ ସହିତ ବ୍ୟବହାର କରନ୍ତୁ । ଡାକ୍ତର ଓଝା ଦିଲ୍ଲୀରେ ଥିବା ଆମେରିକା ଦୂତାବାସ ମାଧ୍ୟମରେ ଏହି ଗାମୁଛାକୁ ଟ୍ରମ୍ପଙ୍କ ନିକଟକୁ ପଠାଇଛନ୍ତି। ଏହି ଗାମୁଛାକୁ ପାର୍ସଲ ସ୍ପିଡ଼ ପୋଷ୍ଟ ମାଧ୍ୟମରେ ବାରଣାସୀରୁ ପଠାଯାଇଥିବା ଜଣାପଡ଼ିଛି । ଡାକ୍ତର ଉତ୍ତମ ଓଝା ଆହୁରି ମଧ୍ୟ କହିଛନ୍ତି କି, ସେ ନିଜେ ମଧ୍ୟ ଏହି ଗାମୁଛାକୁ ବ୍ୟବହାର କରୁଛନ୍ତି। ଏହା ସହିତ ସେ ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ଅନ୍ୟ ଲୋକମାନଙ୍କୁ ମଧ୍ୟ ଏହାକୁ ବ୍ୟବହାର କରିବାକୁ କହୁଛନ୍ତି।
