ବ୍ରହ୍ମପୁର: ଆସନ୍ତାକାଲିଠାରୁ ମାସ୍କ ପିନ୍ଧାକୁ ବାଧ୍ୟତାମୂଳକ କରିଛନ୍ତି ସରକାର । ଘରୁ ପଦାକୁ ବାହାରିଲେ ମାସ୍କ ବାଧ୍ୟତାମୂଳକ। ଏପରି କ୍ଷେତ୍ରରେ ବ୍ରହ୍ମପୁର ଦେଶୀ ବେହେରା ମାର୍କେଟ ସଂଘ ପକ୍ଷରୁ ଆରମ୍ଭ ହୋଇଛି ‘ନୋ ମାସ୍କ, ନୋ ରେସନ’ । ଯେଉଁମାନେ ମାସ୍କ ପିନ୍ଧି ଆସିବେ ନାହିଁ ସେମାନଙ୍କୁ କୌଣସି ସାମଗ୍ରୀ ବିକ୍ରି କରାଯିବ ନାହିଁ ବୋଲି ବଜାର କମିଟି ସତର୍କ କରାଇ ଦେଇଛି ।
ଅନ୍ୟପକ୍ଷରେ ବଜାରରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ, ପନିପରିବା କିଣିବାକୁ ହେଲେ ସାମାଜିକ ଦୂରତ୍ବ ଉପରେ ଗୁରୁତ୍ବ ଦେଇଛନ୍ତି ସରକାର । ଏକ ସମୟରେ ଜଣେ ବ୍ୟକ୍ତି ସାମଗ୍ରୀ କିଣାକିଣି କରିପାରିବ ଓ ସର୍ବନିମ୍ନ ୩ରୁ ୬ ଫୁଟ ଦୂରତା ରଖିବାକୁ ପରାମର୍ଶ ଦିଆଯାଇଛି । ଏପରି କ୍ଷେତ୍ରରେ ବଜାର କମିଟିର ପଦକ୍ଷେପକୁ ବିଭିନ୍ନ ମହଲରେ ପ୍ରଶଂସା କରାଯାଇଛି । ସୂଚନାଯୋଗ୍ୟ ଯେ ଗଞ୍ଜାମ ଜିଲା ପ୍ରଶାସନ ମାସ୍କ ନ ପିନ୍ଧିଲେ ଜୋରିମାନା ଆଦାୟ ପାଇଁ ନିର୍ଦେଶ ଦେଇଛି । ମାସ୍କ ନ ପିନ୍ଧି ଘରୁ ବାହାରିଲେ ସହରାଞ୍ଚଳରେ ୧ ହଜାର ଟଙ୍କା ଓ ଗ୍ରାମାଞ୍ଚଳରେ ୫ଶହ ଟଙ୍କା ଜୋରିମାନା ଆଦାୟ କରାଯିବାକୁ ଜିଲାପାଳ ନିର୍ଦେଶ ଦେଇଛନ୍ତି ।
