କରୋନାକୁ ନେଇ ଫ୍ଲୋରିଡାରେ ନୂଆ ନିୟମ

ବିଶ୍ବସ୍ତରରେ କରୋନା ଭାଇରସ୍‌‌ର ପ୍ରକୋପ ବଢ଼ିଚାଲିଥିଲାବେଳେ ରୋଗକୁ ସମୂଳେ ନିପାତ ନିମନ୍ତେ ବିଭିନ୍ନ ଦେଶର ସରକାର ପ୍ରମୁଖ ପଦକ୍ଷେପମାନ ନେଉଛନ୍ତି। ନିକଟରେ ଫ୍ଲୋରିଡାର ପ୍ରଶାସକ ଲୋକଙ୍କୁ ସତର୍କ ସୂଚନା ଦେଇଥିବାର ପ୍ରକାଶ। ପ୍ରଥମେ ସେ ବାପା-ମା’ଙ୍କୁ ଧନ୍ୟବାଦ ଜଣାଇଛନ୍ତି ଯେ ସେମାନେ ଛୋଟ ପିଲାଙ୍କୁ ନେଇ ବାହାରକୁ ଆଦୌ ଆସୁନାହାନ୍ତି। ନବଜାତ ଠାରୁ ୧୪ ବର୍ଷ ବୟସର ପିଲାଙ୍କୁ ଘରେ ଅଭିଭାବକ ବୁଝାଇସୁଝାଇ ରଖୁଥିବାବେଳେ କିଶୋରମାନେ କିନ୍ତୁ ଅମାନିଆ ହେଉଥିବାର ଦେଖାଯାଉଛି। ପ୍ରଶାସକଙ୍କ ନୂତନ ନିୟମ ଅନୁସାରେ, ଏଇ ରୋଗରୁ ରକ୍ଷା ପାଇବାକୁ ଚାହୁଁଥିଲେ, ସାମାଜିକ ଦୂରତା ନିତାନ୍ତ ଜରୁରୀ। ଗୋଟିଏ କୁମ୍ଭୀରର ଲମ୍ବା ଯେତିକି, ସେଇପରି ଦୂରତାରେ ପରସ୍ପରଠାରୁ ରହିବା ଆବଶ୍ୟକ ବୋଲି ପ୍ରଶାସନ ପରାମର୍ଶ ଦେଇଛନ୍ତି। ସାଧାରଣ କୁମ୍ଭୀରର ଲମ୍ବ ୪.୧-୫.୪ମିଟର ହୋଇଥାଏ। ଏଣୁ ଅତି ଆବଶ୍ୟକ ପଡ଼ିଲେ, ଯଦି ବାହାରକୁ ଯାଉଛନ୍ତି ସେଭଳି ସ୍ଥିତିରେ ମାସ୍କ ଓ ଗ୍ଲୋଭସ୍‌ ପିନ୍ଧିବା ସହ ଅନ୍ୟମାନଙ୍କ ଠାରୁ ନିଜକୁ ଦୂରେଇ ରଖନ୍ତୁ। ପ୍ରଶାସକ ଏହା ମଧ୍ୟ ପରାମର୍ଶ ଦେଇଛନ୍ତି, ଅନ୍-ଲାଇନ୍ ଜରିଆରେ ସାମଗ୍ରୀ ମଗାଇ ନେବା ସବୁଠୁ ଉତ୍ତମ ଉପାୟ।