ବ୍ରହ୍ମପୁର : ମୃତ୍ୟୁ ପରେ ବି ଜୀବିତ ରହିବ ଚକ୍ଷୁ। ଅନ୍ୟ ଜଣଙ୍କୁ ଦୃଷ୍ଟି ଶକ୍ତି ଦେଇ ପାରିବ। ବ୍ରହ୍ମପୁର ସହରର କପିଳେଶ୍ୱର ପେଟା ସାହିର ଏକ ପରିବାର ଚକ୍ଷୁଦାନ ପରି ମହାନ କାର୍ଯ୍ୟ କରିଛନ୍ତି। ଟି. ପାର୍ବତି ଆମ୍ମା ନାମକ ବୟସ୍କା ମହିଳା ମୃତ୍ୟୁପରେ ତାଙ୍କ ବଡପୁଅ ଟି.କାମେଶ୍ୱର ରାଓ ମା’ଙ୍କର ଦୁଇଟି ଆଖିକୁ ଏମ.କେ.ସି.ଜି ଚକ୍ଷୁ ବିଭାଗରେ ଦାନ କରିଥିଲେ। ଏହାର କିଛି ସମୟପରେ ଟି. କାମେଶ୍ୱର ରାଓ ଅସୁସ୍ଥତା ଅନୁଭବ କରିଥିଲେ। ତାଙ୍କୁ ଚିକିତ୍ସାପାଇଁ ଏମ.କେ.ସି.ଜି ମେଡିକାଲ କଲେଜ୍ରେ ଭର୍ତ୍ତି କରାଯାଇଥିଲା। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହାପରେ ତାଙ୍କର ସ୍ତ୍ରୀ ଟି. କାମେଶ୍ୱରଙ୍କ ଦୁଇଟି ଚକ୍ଷୁକୁ ଦାନ କରିଛନ୍ତି। ଏହି ମହତ କାର୍ଯ୍ୟରେ ପରିବାର ଲୋକେ ସହଯୋଗର ହାତ ବଢାଇଛନ୍ତି।
ଟି. କାମେଶ୍ୱର ରାଓ ଜଣେ ସମାଜସେବୀ ଥିଲେ। ସେ ମାତୃ ଓ ଶିଶୁମଙ୍ଗଳ କେନ୍ଦ୍ରର ସମ୍ପାଦକ ଓ ଲୁଗା ବ୍ୟବସାୟୀ ସଙ୍ଘର ସମ୍ପାଦକ ଭାବେ କାର୍ଯ୍ୟ କରୁଥିଲେ। ଉଭୟ ମା’ ଓ ପୁଅର ବିୟୋଗରେ ସେହି ଅଞ୍ଚଳରେ ଶୋକର ଛାୟା ଖେଳିଯାଇଛି। ଏଥିସହ ଏଭଳି ମହତ୍ୱ କାର୍ଯ୍ୟ ଅନେକଙ୍କ ମନରେ ପ୍ରେରଣା ଦେବା ସହ ଉଦାହରଣ ସୃଷ୍ଟି କରିଛି।
